Systurnar játa syndir sínar

2007-11-16T17:36:00.000Z

Heilræði

Ég fékk helvíti gott ráð frá vinkonu minni um daginn.

Ef einhver er að glápa á þig og þér líkar það ekki skaltu færa fingurinn að nefinu og stinga honum varlega upp í aðra nösina. Síðan skaltu gjörsamlega gleyma þér við að bora í nefið af mikilli innlifun.

Það er víst stórkostlegt að sjá hvernig svipur fólks breytist í hryllingssvip þangað til það getur ekki horft á þig lengur.

Þeir sem ákveða að prófa þessa aðferð látið mig vita hvernig gekk!!!

2007-10-13T21:42:00.000Z

UpDATE. Fréttir liðinnar viku!

* Krakkarnir í bekknum mínum áttu að skrifa hryllingssögu heima. Nóttina eftir að ég fór yfir verkefnin dreymdi mig varúlfa, leðurblökur og beinagrindur. Næst læt ég þau skrifa um nammi, ferðalög og Brad Pitt.

* Bikinitoppurinn minn losnaði þegar ég fór ofan í barnalaugina á miðvikudaginn. Þetta er í annað sinn sem þetta gerist en samt tvö ólík bikini. Blessunarlega var barnalaugin ekki full af saklausum börnum, bara 2 menn. Næst nota ég vatnshelt lím, nagla og hamar til að halda þessu kvikindi uppi.

* Ég er að hugsa um að sauma mér einhvers konar hlífðarsokkabuxur þar sem ég er meidd á báðum lærum, báðum ökklum, hnénu og stundum í nára. Hlífarnar eru hvort sem er svo margar að þær ná eiginlega saman.

* MIG LANGAR SJÚKLEGA Í BANDÝ!!!

2007-07-16T15:22:00.001Z

Hvernig svarar þú í vinnusímann?

Ég er vön því að kynna mig með nafni í símann á stöðum sem ég er að vinna hjá. En hvað gerir maður þegar vinnustaðurinn rímar við nafnið manns? Í sumar nefni ég bara fyrirtækið og steinheld síðan kjafti.

Kjelling?

Ég hata að vera kölluð kjelling en hvað er ég annað fyrst ég gat ekki bakkað niður bröttu brekkuna hjá Prentsmiðjunni og alls ekki keyrt upp hana aftur. Ég kenni frekar þessari heimskulegu uppfinningu "beinskiptingu" um.

2007-03-05T10:12:00.000Z

Ekkert að frétta af systrunum?

2007-01-22T14:07:00.000Z

Boðskapur?

2006-12-05T17:13:00.000Z

Dóni

Boðskapur sögunnar... stundum er í lagi að fara í lýtaaðgerð ;)

2006-11-26T22:26:00.000Z

Leyndarmál foreldra

2006-11-17T20:22:00.000Z

Ekki bara í bíómyndunum...

Ég fór í Kringluna í gær og þeir sem þekkja mig vel vita að ég hata helvítis snúningshurðina. Mér líður hræðilega að vera föst inn í þessu glerbúri og reyni að komast út sem fyrst. Í gær var ég heldur fljót á mér og var í búrinu með fullt af fólki sem gerir þessa vist ennþá verri. Ég stóð alveg upp við glerið til að vera fyrst út og þegar ég sá í heiðan himininn var ég ekki lengi að þjóta af stað. Það versta var að hurðin var ekki alveg farin hringinn og ég hljóp harkalega beint á glerið og andlitið á mér flattist á glerinu. Ég sagði bara "úbbosí", dreif mig út þegar ég loksins gat og hljóp að bílnum!! Úbbosí!

2006-10-31T21:51:00.000Z

Sjitt hvað ég er fegin að hafa ekki fylgt eftir leiklistardraumum mínum og farið í Leiklistardeild Listaháskóla Íslands!!!

2006-10-14T18:54:00.000Z

Ógleði
Það eru tveir staðir sem vekja upp hjá mér viðbjóð þegar ég geng framhjá þeim. Oftar en ekki kúgast ég á leiðinni:

1. Kjötborðið í verslunum
2. Leikskólar

2006-09-24T12:14:00.000Z

GAME TV
Eins og flestir vita hef ég stanslaust verið að senda meil á "game tv" og óskað eftir því að gerast nörd vikunnar. Draumurinn hefur orðið að veruleika því í þarnæsta þætti koma myndir af mér liggjandi í sófanum spilandi "böbbles" á fullu. Í verðlaun fékk ég gleraugu, reiknistokk og asmalyf.

2006-09-08T22:00:00.000Z

The perfect storm
starring Laugarvatn's 3rd year at the class Útivist group II and the Rescue team of Laugarvatn city

"ROW ROW ROW YOUR BOAT
GENTLY DOWN THE STREAM
Merrily, merrily, merrily, merrily,
Life is but a dream"

Þetta lag er um það bil það mest óviðeigandi sem ég veit um þessa stundina. Hvernig getur svona ljúft og fallegt lag verið til um jafn hryllilegan hlut og að sigla bát?

Það var sko ekki róið "gently" í gegnum öldurnar og brimið í storminum í dag. Lífið líktist helst martröð þegar við Ágústa Tryggva vorum fastar í ánni og svo mikill mótvindur að alveg sama hversu mikið við rérum þá fórum við ekkert áfram.

Einar frændi og Arnar Felix veltu bátnum sínum og Einar lendi undir bátnum.

Kalla þurfti Björgunarsveitina á staðinn þar sem fólkið var hálf stjórnlaust á vatninu og barðist fyrir lífi sínu.

Efni í hörku reifara

2006-07-15T15:22:00.000Z

BANDÝ
Það verður keppni í bandý á Sumarhátíðinni um næstu helgi, 23. júlí. Allir sem kylfu geta valdið eiga að skrá sig hjá mér sem fyrst. 3 manna lið og leyfður einn varamaður. Allir sem spila bandý eru töff!!!!

2006-06-27T19:27:00.000Z

Ég mæli ekki með...

... að detta niður stiga rétt fyrir útlandaferð og vera með stærðar marblett á lærinu. Það passar EKKI vel við nein sundföt.

... að búa annars staðar á Íslandi en á Austurlandi. Alltaf sól og allir brúnir.

... að HLAUPABÓLAN vakni úr dvala og leggist á mann. Ekki fallegt og ALLS EKKI þægilegt.

... að einhver geri grín af hlaupabólunni minni. Það gæti endað illa.

... kjöt/mannáti.

2006-05-09T17:25:00.000Z

Perrapadda
Ég vissi ekki að pöddur væru perrar. Ég komst bara að því áðan þegar padda laumaði sér inn um hálsmálið á bolnum mínum... og ég sem hélt að karlmenn væru slæmir.

2006-03-22T21:11:00.000Z

Sakleysi
Við höfum örugglega öll lent í því að vera að hlusta á lag í útvarpinu og misheyrt eða misskilið eitthvað í textanum ... tja ég geri það heldur betur fyrir nokkrum árum þegar ég heyrði nýja "jólalagið" hans Tom Jones og söng um stræti Egilsstaðabæjar:
"santa claus, santa claus, you're my santa claus"
Þetta var að sjálfsögðu lagið "sex bomb" en mér finnst mín útgáfa miklu betri.

Bandý í Svíþjóð
Fyrir bandýáhugamenn. Ég er að fara til Svíþjóðar á HM 2006 og ef ykkur vantar eiginhandaráritanir frá hetjunum ykkar látið mig vita og ég reyni að redda því!!

2006-03-13T22:07:00.000Z

Þessir karlmenn...
Karlmenn geta verið ótrúlega bíræfnir. Í gær bað karlmaður mig um símanúmerið mitt alveg uppúr þurru. Ég var nú ekki alveg á því að gefa honum það og sagði við hann að ég ætti frábæran kærasta og auk þess væri hann alls ekki mín týpa. Ég sá að hann varð vandræðalegur en hann skyldi sko alls ekki fá að sleppa svo auðveldlega. Ég sagði við hann að ég væri nú sko miklu meira en útlitið en þið ógeðispöddurnar hugsið bara með heilanum á milli fótanna. Hann væri bara helvítis perri að reyna svona við mig.
Þá sagði hann við mig BARA til að reyna að redda sér að það væri nú venjan að fá símanúmerið hjá fólki þegar það leigði dvd-myndir í fyrsta sinn og væri ekki á skrá. "Góð tilraun PERRINN ÞINN..." En fáránleg afsökun. Ég sagði honum að troða myndinni þar sem sólin ekki skini og strunsaði út úr videoleigunni. Ég fékk kannski ekki dvd-myndina en ég gekk allavega út með sjálfsvirðinguna.

2006-03-03T12:27:00.000Z

Kennslustund fyrir Reykvíkinga:
Ókei - Reykvíkingar eru kannski almennt betri en landsbyggðarfólk í að skipta um akrein, leggja samsíða og keyra í gegnum hringtorg en það er eitt sáraeinfalt atriði sem hefur gleymst að kenna þeim. Það er pinni vinstra megin við stýrið sem hægt er að færa upp og niður. Með notkun þessa pinna kveikir maður á stefnuljósinu sem sýnir öðrum ökumönnum í hvaða átt þeir ætla. Það skiptir kannski ökumanninn sjálfan litlu máli hvort hann gefi stefnuljós eða ekki en það getur skipt aðra ökumenn og gangandi vegfarendur miklu máli. Ég vona að þessi stutta kennslustund hafi komið að einhverju gagni og Reykvíkingar skrifi þetta niður hjá sér, fari síðan út í bíl og prófi sig áfram. Í staðin skal ég fara á afvikinn stað og fara að æfa mig í að leggja samsíða sem er mér gjörsamlega ómögulegt.

2006-02-15T12:05:00.000Z

Sökkvum Austurlandi
Ég sá inn í framtíðina í gegnum draum um daginn og ég vaknaði með tárin í augunum. Það var búið að virkja svo mikið að það var búið að sökkva öllu Austurlandi nema stærstu þéttbýlisstöðum.

Nammilausir dagar
Þar sem ég er mesti nammigrís í heimi hef ég reynt að hafa um tvo nammilausa daga í viku þ.e BARA FIMM nammidaga í viku.
Er nokkuð svindl að fá sér lucky charms þegar maður er með nammilausan dag?

2006-01-17T11:37:00.000Z

Aldrei þessu vant er smá öndunarpása í vinnunni, og mér leiðist. Nenni ekki að skoða mbl.is einu sinni enn, einu síðuna sem mér dettur í hug að skoða. Óska hér með eftir ábendingum um skemmtilegar síður...
Ég er búin að vera á fullu að kaupa inn fallega muni á fallega heimilið mitt, sem ég get ekki beðið eftir að flytja inn á. Það fer að styttast, en ég tel niður stundirnar. Held það geti ekki verið gott fyrir sálina að búa of lengi inni á vinum og ættingjum. Þó er ég þakklát fyrir að hafa fengið þennan samastað á meðan ég beið eftir afhendingunni, því að annars hefði ég ekki haft efni á að “mubbla mig upp” :) Komst líka að því að það er voða gott að vera Héraðsbúi stundum, sérstaklega þegar Hattarafsláttur er í boði. Virðist skipta litlu máli hvort maður hafi einhverntímann sparkað í bolta á ævinni eða ekki.
Annars er ekkert að frétta, er bara búin að vera í rólegri kantinum undanfarið. Kíkti þá aðeins út um helgina og átti mjög athyglisverðar tvær kvöldstundir. Kynntist kínverskri menningu á föstudagskvöldið á barnum á Hótel Loftleiðum og á laugardagskvöldið lenti ég í kynferðislegri áreitni af hálfu kvenmanns, sem hingað til hefur haft sæmdartitilinn “vinkona”; en sé fram á að þurfa að endurskoða það. Það er ekki auðvelt að missa þennan heiður, en það getur gerst ef ekki er aðgát höfð á.
Vona að þið hafið það öll gott á nýja árinu, un leið og ég sendi Steingrími J. mínar bestu óskir um góðan bata.

2005-12-27T16:39:00.000Z

Nýtt systkini
Ég og mamma vorum að skreyta á Þorláksmessu þegar hún spurði mig á meðan ég raðaði jólasveinum í hilluna hvað mér þætti um að eignast systkini. Ég varð mjög undrandi og spurði hvort hún væri að fara að eignast barn rúmlega fimmtug konan. Hún þagði í smá tíma og sagði síðan
"Nei, ekki beint".
Ekki beint? Ertu að fara að ættleiða.
"Já eiginlega" segir mamma.
Jesús minn... mamma er búin að gefast upp á mér og Möggu og heldur að hún eignist aldrei barnabarn og ætlar að ættleiða það hugsaði ég.
"já hvernig líst þér á að fá eitt lítið svart systkini?"
Emmm bara ágætlega sagði ég ringluð og reyndi nú að sýna stuðning.
"Já gott" sagði mamma. "Við pabbi þinn erum nefninlega að hugsa um að gerast heimsforeldrar og borga 1000 kall á mánuði til að barn í Afríku fái mat, föt og að ganga í skóla."
Ohhh mamma... þú ert svo mikill grallari ;)

2005-12-14T14:00:00.000Z

Draumaprinsinn - VARÚÐ VÆMNI. EKKI FYRIR ROKKARA, MORÐINGJA OG TÖFFARA!!!
Eins og sannir aðdáendur mínir og síðunnar okkar systra og hálfsystur muna eflaust eftir þá setti ég á bloggið þann 22. mars 2004 lista sem ég gerði af draumaprinsinum mínum þegar ég var yngri. Ég sá samt fljótlega að það var enginn leið að finna einhvern sem uppfyllti þessar kröfur og því pakkaði ég listanum saman og setti í skúffuna mína. Hér er færslan:

Þegar ég var aðeins yngri... ekki mikið samt... áttu strákar að uppfylla eftirfarandi skilyrði til að vera eftirsóknarverðir:
1. Dökkhærður
2. 185-195 cm á hæð.
3. Æfa körfubolta og vera góður í körfu auk þess að standast þær kröfur að vera nokkuð góður í öllum eðlilegum íþrótagreinum t.d. handbolta, fótbolta, frjálsum, sundi og fl.
4. Greindur og fá ágætis einkunnir. Þó ekki bókaormur.
5. Fyndinn en ekki á kosnað annarra.
6. Vera með flottan brjóstkassa og líta vel út ber að ofan.
7. Elska mig skilyrðislaust og ekki horfa á aðrar stelpur.
8. Sætur
9. Horfa á NBA.
10. Ekki horfa á formúluna.
11. Má ekki vera sporðdreki og helst ekki fiskur
12. Kostur að vera tvíburi eða vatnsberi
13. Gera allt fyrir mig og ég allt fyrir hann
14. Kunna að gera við bíla og eiga bíl og skutla mér þangað sem ég vil fara.
15. Engin eða fá bringuhár takk en ekki raka þau af.
16. Enginn ógeðisperri.
17. Vera besti vinur minn og hægt að segja honum allt.
18. Óhræddur við að vera rómantískur og dýrka ástarljóðin sem ég sem handa honum
19. grannur en stæltur... já og bara allt annað.

Ég tók þennan lista til endurskoðunar og nú þarf sá hin sami að uppfylla 3 skilyrði:
1. Gagnkvæm virðing
2. gagnkvæm hrifning
3. Má ekki vera sjálfsstæðismaður!!

Gangi mér vel í leitinni að hinum eina rétta:D

Eins og glöggir einstaklingar taka eflaust eftir þá á þessi lýsing nákvæmlega við um kærastann minn. Þessi leit af draumaprinsinum er því ekki fyrirfram dauðadæmd og því hvet ég alla einhleypa kvenmenn að fara í skúffurnar sínar og taka upp krumpaða listann sinn og sætta sig við ekkert minna en það. Það er pottþétt leið til hamingjunnar.

ATH: Ég tek enga ábyrgð á því ef einhver kúgast yfir væmninni í mér. Ég varaði ykkur við. Farið þá bara að skoða splatter myndir og klám til að ná andlegu jafnvægi aftur;)

2005-12-12T16:59:00.000Z

Að springa úr ást

2005-12-08T11:53:00.000Z

Sólskin og sleikipinnar. Regnbogar allsstaðar!

Í dag er mesti hamingjudagur lífs míns.
Ég bjargaði Tomma frá drukknun á góðum tíma og þarf ALDREI að gera þennan andskota aftur. Þeir sem ekki vita þá var ég í verklegu prófi í björgun í morgun og hef ekki sofið af stressi af ótta við að drekkja "Chucky" eða sjálfri mér og þurfa að taka þennan andskota aftur.

Steingrímur stóð með mér allan tímann og blessun hans gaf mér þann styrk sem ég þurfti... já og kannski poweraid. Þá er ég hér með hætt að reyna að fita mig til að fljóta betur í marvaðanum enda ældi ég allan sunnudaginn af of mikilli nammineyslu. Belive it or not þá er ég komin með ógeð af nammi og vil ekki sjá þann andskota framar... allavega ekki fyrr en um næstu helgi.

Baywatch
Framinn er líka floginn af stað enda voru njósnarar frá Baywatch þáttunum á staðnum. Þeim leist svo vel á mig í marvaðanum og sundinu auk þess sem ég var "dem hot" í bómullarfötunum með sundhettu að þeir buðu mér starf í þáttunum. Ég verð yngri systir CJ Parker og heiti JC Parker. Einkenni mitt í þáttunum er vergirni og dvergafetish og ástarsamband mitt við Mitch Buchanon endar þegar ég sker af honum fæturnar. En meira ætla ég ekki að segja. Þið verðið bara að horfa á þættina.

2005-11-30T17:52:00.000Z

2005-11-24T17:01:00.000Z

Einelti
Er ekki besta leiðin til að leggja fólk í einelti að gera það á netinu og á bloggsíðunni sinni? Ég hef heyrt að það tíðkist meðal grunnskólanema. Þar sem ég er brjáluð og full hatri til ákveðins einstaklings ætla ég að leggja hann í einelti á síðunni minni. ÞÚ VEIST HVER ÞÚ ERT!!!!
13 things I hate about you!!!!

Þessi einstaklingur er ógeðslega leiðinlegur.
Hann er viðurstyggilega pirrandi náungi og gerir allt til að gera fólki lífið leitt.
Hann er alltaf í sömu ógeðslegu fötunum.
Hann er stirðbusi
Hann er ljótur
Hann er lágvaxinn
Hann svarar ekki þegar á hann er yrt
Hann flýtur illa
Hann er þungur
Hann kemur aldrei með í heita pottinn
Það er ekki gaman að troða marvaða með hann
... og ekki gaman að synda með hann fram og til baka.
Andlitið er að rifna af honum

Hate him hate him wouldn't wanna date him!!!

Ég HATA þig TOMMI!!!

2005-11-13T18:59:00.000Z

Hetjan ég -(vil taka það fram að eftirfarandi var ekki draumur)!!!!
Þetta er án efa ROSALEGASTA LÍFSREYNSLA sem ég hef lent í.
Síðasta fimmtudag bjargaði ég heilum þremur mannslífum.
Maður er oft í vafa hvort maður myndi spjara sig ef maður kæmi að slysi og það sannaðist svo sannarlega þennan dag. Ég var að vísu ekki ein á ferð heldur voru með mér nokkrir nemendur skólans.
Að sjálfsögðu voru við sjokkeruð í fyrstu enda fæst okkar vön því að koma að slysi. Ég tók að mér að róa lítið slasaða konu sem hafði orðið fyrir sjokki og var móðursjúk. Ég náði að koma henni af slysstað og róa hana niður. Við hringdum í 112 en reyndum að gera hvað við gátum þar til sjúkrabílinn kæmi.
Fólkið sem lenti í slysinu var misslasað. Einn hafði misst hendina og Nonni náði fljótt að stöðva blæðinguna. Ég leitaði að frekari meiðslum og fljótt kom í ljós opið beinbrot við ökkla. Ég klippti sokkinn af og bjó um sárið eins og vel og ég gat. Það var allt út í blóði og erfitt að vinna við þessar aðstæður. Ég vil eiginlega ekki segja frá fleiru enda vil ég ekki endurupplifa þennan skelfilega dag. Þetta tók rosalega á og allan daginn og næsta dag var ég í hálfgerðu móki hugsandi til baka.

Krakkarnir á Laugarvatni voru samt að reyna að telja mér trú um þetta væri bara skyndihjálparæfing og ég væri að taka hlutunum full alvarlega. Það hefði ekkert verið jarðskjálfti og þetta væri ekki hús sem hafði hrunið heldur skólastofan og slasaða fólkið aðrir nemendur með gerviáverka. Þau ná sko ekki að gabba mig. Hvernig getur blóð verið gervi? Ég veit að ég er hetja og án mín væru allavega 3 einstaklingar látnir.

2005-11-01T23:08:00.000Z

Keppnin
Ég var að keppa í kvöld og varð fyrir miklum vonbrigðum með frammistöðu mína. Ég stóð mig ekki alveg eins vel og ég hafði vonast til. Ég lagði svo mikið undir og mikið var í húfi en engu að síður brást ég á ögurstundu þrátt fyrir allan undirbúninginn.
Þetta tók á taugarnar. Svitinn lak niður ennið mitt og ég gjóði augum til keppinauta minna sem virtust allir halda einbeitingu sinni. Kannski var stressið orðið of mikið og hafði áhrif á frammistöðuna því of mikið stress getur haft slæm áhrif á frammistöðu í keppni.
Það var ekki laust við að keppnisskapið segði til sín og ég blótaði talsvert á keppnisstað enda klúðraði ég hverju tækifærinu á fætur öðru. Ég þurfti að horfa upp á aðra leikmenn, án hæfileika, sigra af einskærri heppni.
Að lokum þoldi ég ekki við lengur. Ég hætti keppni og hljóp með tárin í augunum inn í herbergi mitt á heimavistinni. Ég ætla sko ALDREI að spila bingó aftur.

2005-10-25T17:06:00.000Z

Þarf ekkert að skammast mín!!!
Í gær var kennarinn minn að tala eitthvað um áhættu í íþróttum og spurði háðslega yfir bekkinn: "... en þekkiði einhvern sem hefur slasað sig í keilu" eins og það væri eitthvað asnalegt eða ómögulegt. Ég var að hugsa um að standa upp og segja með stolti "já ég". Ég þarf ekkert að skammast mín fyrir það að hafa stigið á keilubrautina á sleipu keiluskónum (sem eru auðvitað BARA slysahætta) og flogið... já FLOGIÐ á rassinn á brautinni og legið þar haldandi enn á kúlunni í hendinni.
Ég skil heldur ekki af hverju ALLIR í keiluhöllinni horfðu á mig og hlógu á meðan ég lá á brautinni. Ekki er hlegið þegar fótboltakallar eru tæklaðir illa á vellinum eða þegar dýfingarmenn reka hausinn í pallinn.
Ég hef allavega ekkert að skammast mín fyrir. Ekkert frekar en Beckham, Barkley og Eiður Smári sem lenda, eins og ég, líka í íþróttameiðslum án þess að hlegið sé af þeim.

2005-10-13T16:01:00.000Z

Rassafetish
Ég var að spjalla við stelpu um daginn sem sagði mér frá bróður sínum var haldinn algjöru rassafettisi. Hann var til dæmis með rassamyndir á veggnum heima hjá sér og sem background í tölvunni sem hann skipti þó alltaf reglulega um. Þetta fór fyrir brjóstið á systur hans sem ákvað að olíubera rassinn á sér og fá vinkonu sína til að taka mynd af honum. Þær fóru síðan og fótósjoppuðu hana til með því að búa til einhvern ægilegan bakgrunn. Vinkonan sendi bróður stelpunnar síðan tölvupóst með myndina af rassi systur hans sem viðhengi án þess að segja hvers rass þetta væri. Sagðist bara hafa fundið hann á netinu.
Nokkru seinna fór stelpan inn til bróður síns sem var í tölvunni og sá nýja backgroundið sem var jú rassinn hennar. Hún spurði hvort hann fílaði ekki rassinn og fyndist hann flottur og hann játaði því. Þetta væri alveg hreint geggjaður rass og hann væri sko alveg til í að taka í eina svona. Þá gat hún ekki orða bundist og hrópaði: Þetta er rassinn á mér ógeðið þitt!!!
Hvort hann hafi læknast af þessu rassafetishi veit ég ekki en betri leið til að gera heiðarlega tilraun til að lækna hana get ég ekki ímyndað mér. Bara snilld!!

2005-10-09T20:58:00.000Z

Grænmetisæta

Ég ætla hér með að svara í eitt skipti fyrir öll af hverju ég borða ekki kjöt.

Mér finnst það ógeðslega vont á bragðið og ég fæ hroll við tilhugsunina.
Mér verður óglatt við að éta það.
Ég finn oft rollubragð eða rollulykt af kjöti.
Mér finnst óhugnarlegt að éta þau dýr sem ég klappa.
Mér finnst hræsni að vona með öllu hjarta að grísinn Babe sleppi frá því að vera slátrað og éta beikon á meðan.
Það getur verið lífshættulegt samanber kúariða, fuglaflensa, salmonella og rolluriða... hver hefur heyrt um eplaflensu, appelsínusalmonellu eða gúrkuriðu?
Mér finnst hugmyndin um að borða lambaafganga hakkaða saman við svínaafganga og sinum og ógeði og sett í lambagörn ógeðsleg. "Ein með öllu" er fyrir mér svo sannarlega ein með öllu. Lagast ekkert við að vera sett í brauð og skellt einhverjum sósum og lauk á.
Ég finnst hræðilegt að borða eitthvað sem hefur átt mömmu og systkini og ef til vill hefur átt nafn.
Ég er á móti því að slátra öðrum lifandi verum og reyna að gera það listugra með því að skýra það einhverju grípandi nafni eins og naggar, pylsur, gordon bleu eða big mac.
Síðast en ekki síst. Moby borðar ekki kjöt!!!

Ég vil taka það fram að þetta er ekki áróðurspistill. Ég vil bara að fólk virði skoðanir mínar eins og virði skoðanir þeirra. Mér er alls ekki illa við fólk sem étur hold þó það sé í raun óbeinir morðingar ;)

2005-10-03T10:11:00.000Z

Hræðilegur mannþekkjari

Ég hef þann hvimleiða galla að vera einn versti mannþekkjari sögunnar.

Til allrar hamingju var ég ekki uppi í Þýskalandi nasismans því mér hefði fundist sjálfur Adolf Hitler vera hinn ljúfasti maður og eflaust farið á nokkur deit með honum. Ég myndi telja að áhuginn sem hann myndi sýna mér væri vegna þess hversu góð manneskja ég væri en ekki vegna þess að ég væri ljóshærð með blá augu og af arískum kynstofni.

Hefði ég verið í Mongólíu á 13. öld hefði ég örugglega verið skotin í Genghis Kahn og fundist hann æðislegur og frábær manneskja. Ég hefði lofað hann í hásterrt við vini og vandamenn og sagt þeim að betri og góðhjartaðri mann væri ekki að finna á jarðkringlunni.

Kobbi kviðrista hefði verið elskhugi minn og hefði ég beðið hans heima á köldum vetrarkvöldum og hlakkað til að sjá hann eftir að hann væri búinn að vinna "yfirvinnuna" sína.

En blessunarlega þarf ég ekki að hafa áhyggjur af þessu lengur. Eiginmannsefni mitt er fundið og blessunarlega hef ég þekkt þann yndislega mann í mörg ár og veit því hvaða mann hann hefur að geyma. Hann er ekki nasisti, ekki illmenni, ekki fjöldamorðingi og ekki sjálfstæðismaður. Hann er allt sem kvenmaður gæti óskað sér og meira til.

2005-09-26T18:31:00.000Z

4 is the magic number.

Íslandsmeistaramótið í bandý var á sunnudaginn og UÍA kom með lið til mótsins. Við stefndum á 4 sætið því 4 er töff tala og okkur tókst það :) Lentum í 2 sæti í riðlinum en töpuðum báðum leikjunum í 4 liða úrslitunum. Við vorum kannski ekki alveg besta liðið í ár en við vorum pottþétt það fallegasta. Við tökum þetta bara á næsta ári.

Þakkir fá eftirfarandi:
* Siggi skólausi fyrir að finna skó.
* Böddi fyrir að vera GEÐVEIKUR markmaður... Hann á sko framtíðina fyrir sér og við seljum hann EKKI.
* Björgvin fyrir að eiga bestu fagnarlætin eftir skorað mark.
* Hjalti fyrir að vera eini maður liðsins til að fá 2 mínútur og að hlæja að bröndurunum mínum.
* Logi fyrir að skemmta sér og okkur vel.
* Beggi fyrir frábæra frammistöðu þrátt fyrir meiðsli.
* Óli Rúnar fyrir að mæta þó þunnur væri og ÆTLA að vinna
* Finnur fyrir að hækka fegurðarmeðaltalið og koma í sund eftir mótið.
* Karólína fyrir að jafna aðeins kynjahlutföllin og standa eins og hetja í strákunum.
* Elva Dögg og Svandís fyrir að vera bestu og fallegustu stuðningsmennirnir.

Ég hlakka til á næsta ári að taka á móti bikarnum!!!

2005-09-22T15:52:00.000Z

Óskráðar reglur íþróttahússins:

Ég gerði að gamni mínu stigaleik þar sem hægt er að sjá hversu margar óskráðar reglur íþróttahússins maður er að brjóta. Þeim mun fleiri stig sem maður fær þeim mun meira "kúl" er maður.

Hlýralausir bolir.
- Sexý kvenmaður: 10 stig.
- karlmaður í hlýralausum netabol: -10 stig

Stuttar stuttbuxur.
-Kvenmaður í kjörþyngd: 10 stig. (ekki þó svo stuttar að það sjáist í rasskinnarnar)
-Karlmaður í víðum og alltof stuttum stuttbuxum sem gengur ekki í naríum: -20 stig.

Tónlist sem spiluð er í salnum.
-Rokk og popp (undanskilið það fyrir neðan): 15 stig
-Homma- og píkupopp, country, eða Bo Halldórsson: -20 stig.

-Fréttatíminn: - 500 stig.

Lykt.
- Svitalyktaeyðislykt: 10 stig
- létt svitalykt: 3 stig
- svo sterk svitalykt að fólk hugsar hver hafi verið að reka við: -15 stig.
- Svo sterk rakspíralykt að fólki liggur við yfirliði eða uppköstum: -25 stig.

Æfingaval.
-Framstig: 5 stig
-Gagnkynhneigður karlmaður í framstigi: -10 stig.
-Gagnkynhneigður karlmaður í framstigi í neta-hlýralausum bol, stuttum og víðum stuttbuxum, með sterkan rakspíra og hlustar á fréttatímann: -1.000.000 stig. (margfeldisáhrif)

Þar hafiði það. Ef niðurstaðan er í plús eruði í góðum málum og örugglega dead-sexy í salnum. Ef ekki þá er betra að gera æfingarnar heima með Ágústu Johnson eða Jane Fonda.

2005-09-18T16:20:00.000Z

Eftir nákvæmlega 14 daga mun ég verða búin að skila inn lokaritgerðinni minni, útprentaðri og fínni. Eftir þann dag vona ég samt að ég verði ekki komin með það mikið ógeð á Hallormsstað og tjaldgestunum þar að ég geti ekki hugsað mér að fara aftur í skóginn... Er búin að sitja við með sveittan skallann í að verða 2 mánuði, og það er ekki gaman, skal ég segja ykkur.
Hef svosem gert ýmislegt svona í og með, þó ekkert í frásögur færandi, nema ég keypti mér íbúð í framhjáhlaupi, og var ekki lengi að því, frekar en öðru sem ég tek mér fyrir hendur. Takk, Erna Kristín:) Fæ ekki afhent fyrr en í febrúar, þannig að ég er pollróleg yfir því.
Já, svo er ég farin að vinna á Höfðabakka, í Landsbankanum. Það er bara mjög gaman og mér líst vel á liðið. Takk, Inga frænka:)
Í hugnum er ég auðvitað allsstaðar annarsstaðar en hér í herberginu mínu við tölvuna mína. Búin að gera stór plön fyrir stórafmælið sem haldið verður upp á með pompi og prakt í vetur, og er búin að versla allt í hvítvínsgerðina. Takk, Halli, minn:) Svo hef ég hugsað mér að sitja ekki aðgerðarlaus eitt einasta kvöld í allan vetur, og ég ætla ekki að kveikja á tölvunni minni fyrr en einhventímann eftir jól:)
Bless í bili,
er að fara í sunnudagssteikina til Ernu&Garðars!! JEI

2005-09-15T11:36:00.000Z

Einn tveir þrír fjórir fimm dimmalimm... -klukk-

Það er líka hægt að fara í leiki í gegnum internetið. Finnur var í eltingarleik við mig og hann klukkaði mig á bloggsíðunni sinni. Það þýðir að ég eigi að deila einhverjum 5 persónulegum hlutum með alþjóð sem eru kannski ekki á allra vitorði:

Hér koma mín dýpstu leyndarmál!!

1. Ég þekki engan sem er meiri sælgætisgrís en ég. Ég hef étið svo mikið nammi að ég ældi og svo hélt ég áfram að éta eftir að vera búin að æla. Ég hætti ALDREI fyrr en allt er búið úr pokanum. Ég hef mjög slæma reynslu af fríhöfninni og versla ALDREI sælgæti þar.

2. Ég fæddist vansköpuð.. þ.e það vantar á mig tunguhaftið. Það þýðir að ég kemst með tunguna upp á nef og get auðveldlega breytt lögun hennar. Ég get gert hana að feitum köggli og örmjórri slöngu og hreyft hana þannig sitt á hvað. Margir hafa líkt henni einmitt við slöngu og einn einstaklingur sem sá mynd af henni hélt að um getnaðarlim á hundi væri að ræða.

3. Ég bjó á Jamaica í eitt ár þar sem ég var skiptinemi. Ég var í strangtrúuðum stelpuskóla þar sem við þurftum að ganga í skólabúning og syngja trúarkvæði og jamaciska þjóðsönginn á hverjum degi. Við vorum 3 hvítar í um 500 manna skóla og ég sú eina næpuhvíta og ljóshærða.

4. Ég elska að hlaupa og hreyfa mig. Ef ég geri það ekki á hverjum degi verð ég brjáluð og græt mig í svefn. Því meira því betra. Íþróttir hafa alltaf forgang... Þess vegna fór ég á Laugarvatn því þá er ég eiginlega að læra heima þegar ég fer að sprikla :) Svo er ég auðvitað Bandýsjúk!!

5. Ég sem ljóð. Hef samið svona 1000 ljóð en er ekki mikið fyrir að sýna öðrum. Veit um fáa skemmtilegri leiki en að kveðast á.

2005-09-09T12:08:00.000Z

Stórslösuð með Stebba Hilmars!!
Mig dreymdi í nótt að ég og Stebbi Hilmars ættum í leynilegu ástarsambandi. Ég hugsaði mér að sjálfsögðu gott til glóðarinnar því hér eftir fengi ég alltaf ókeypis inn á böll með Sálinni og hefði einhvern til að syngja mig í svefn. Fyrir utan að við vorum ástfangin upp fyrir haus. En böggull fylgdi skammrifi því hálf kvenþjóðin varð æf og gerði allt til þess að skemma fyrir okkur elskendunum. Ég sótti ofsóknum kvenna sem karla og að lokum leið samband okkar undir lok. Hádramatískur draumur sem ég ætla mér að selja Sigurjóni Sighvats kvikmyndaréttinn af.

Kannski voru það kvalirnar í nótt sem stuðluðu að þessum draumi en ég tognaði á ökkla á körfuboltaæfingu í gær. Ég svaf semsé með annan fótinn upp í loftið og gat ekki hreyft mig enda líka tognuð á öðrum úlnliðnum. Ég þarf að mæta í glímu á eftir stórslösuð og það verður gaman að sjá hvar ég togna í dag enda læt ég ekki svona smáræði hindra það að ég ráðist á annað fólk.

Það á EKKERT eftir að stoppa mig frá því að mæta á Íslandsmeistaramótið í bandý... hvort sem ég mæti öll teipuð frá toppi til táar, í gifsi, fatla eða með hálskraga.. ég verð sko með liðsmönnum mínum til ómældrar gleði!!! Áfram Austurland!!!!!

2005-08-23T19:29:00.001Z

Paranoja

Ég held ég sé mest paranojd manneskja í heimi. Undanfarið hafa ákveðnar aðstæður valdið því að ég hef verið alveg viss um að nú væri öllu lokið:

* Ég var að ná í verkfæri upp á hillu og fyrir ofan mig var risastór slaghamar. Ég sá fyrir mér hvernig hamarinn datt á hausinn á mér og ég lá í blóði mínu á gólfinu. Ég var ekki lengi að forða mér hljóðandi undan hillunni.

* Í hvert sinn sem ég fer í flugvél er ég handviss um að hún hrapi. Ég lít alltaf í kringum mig og horfi með samúðaraugum á samferðamenn mína sem grunlausir stigu upp í þessa fordæmdu vél.

* Það eru ekki bara flugvélar heldur ÖLL samgöngutæki. Bílar, lestir, sporvagnar, hestar... you name it. Allaf sé ég fyrir mér kvalafullan dauða minn þegar ég er á eða í þessum farartækjum enda backseatdriver-from-hell.

* Ég fór á hestbak í gær og reyndi að einbeita mér að náttúrunni og veðrinu. Ég leit á grasið og í því sá ég blóðslóð mína eftir að ég í huga mínum datt af hestbaki og festist í ístaðinu og drógst á eftir hrossinu sem hljóp að næsta grasbala.

Ég þarf að leita mér hjálpar eða fara að æfa víðavangshlaup ansi stíft!!!

2005-08-12T20:40:00.000Z

Ömurleg nótt!!

Í fyrsta lagi dreymdi mig að ég væri ólétt og ég vissi ekki alveg eftir hvern það var (aðallega þar sem enginn kom til greina).

Í öðru lagi voru áramótin og allir í veislu og að skemmta sér nema ég sem þurfti að vinna alein, kasólétt og fárveik. Með hita og ælandi.

Í þriðja lagi var ég komin í hræðilegt form með síginn rass og spikfeit allsstaðar en allir aðrir búnir að koma sér í geðveikt form og geðveikt flottir.
= Hræðilegasta martröð ever!!!

Nammibannið mikla

Ég fór í nammibann í vikunni og eftir sigurgöngu samdi ég eftirfarandi vísu í gleði minni:

"Sæt er sigurvíman
sigruð nammiglíman
Tókst mér loks að loka
ljótum nammipoka"

Ég féll að vísu á kvöldi 3 dags.

2005-07-31T17:38:00.000Z

Tapað-fundið!
Það er ýmislegt sem maður finnur þegar maður fer í daglegan ruslatínslu-rúnt á tjaldstæðinu og oft hef ég hlaupið í hláturs- ja eða grátkasti inn til að sýna hinum. Meðal þess sem fundist hefur í sumar er:

* Heill illa lyktandi silungur.
* Fylgibréf með endaþarmssmyrsli (í dag!!).
* 2 dauðir menn (áfengisdauðir - var ekki alveg viss í fyrstu- mjög skjerí).
* Saur - bæði manna og dýra. (svoldið kúgast)
* Fullur vodkapeli, hálffullur vodkapeli, full rommflaska, hálffull rommflaska, fullar bjórdósir o.fl. Ég hef að vísu ekki nýtt mér þetta enda tortryggin mjög.
* Karlmanns nærbuxur - einhver lent í smáslysi.
* Kvenmanns nærbuxur -einhver verið að skemmta sér.
* Hjólkoppar, garðstólar, slöngur (dekk -ekki dýrin)
* og svo margt fleira.
Það er greinilega allt að gerast á tjaldstæðinu.

Að lokum!!!
Ég vil óska okkur Karólínu góðrar skemmtunar á ballinu í kvöld á Neskaupsstað. Megum við skemmta okkur hið besta eins og um Verslunarmannahelgina í fyrra þegar við skyldum Akureyrarbæ eftir eld-rauðmálaðan og í rykmekki :)

2005-07-28T12:00:00.000Z

Draumar enn og aftur.

Mig dreymdi í fyrri nótt að ég var að leika í auglýsingu fyrir Íslandsbanka sem var að breyta ímynd sinni og auka þjónustuna. Systir mín, sem var líka að leika, kom heim og sagði við mig: "Ég fór í bankann og nú er ég búin að koma öllu út sem mér lá á hjarta." Ég bara starði á hana skilninglaus en hún dróg mig með sér í bankann. Þar voru 3 básar. Einn sem á stóð gjaldkeri, næsti var þjónustufulltrúi og síðasti var sálfræðingur. Gjaldkerinn hreyfist um eins og elding enda svo fljótur að afgreiða alla því hann þurfti ekki að díla við alla sækópatana. Mér finnst þetta reyndar vera snildarhugmynd.

Annars er ég ekki sú eina í familíunni sem dreymi eins og asni. Pabbi minn var í nótt staddur á bænum Vaði í Skriðdal (þar sem stórbóndinn og snillingurinn Guðmundur Ármannsson á heima) og var að lýsa línustæðinu fyrir mótmælendum á ensku.
Gestrisni Guðmunds verður ekki dregin í efa og hver veit nema helsta útihátíð helgarinnar verði á túninu hjá honum.

Annars er lífið á Ártröðinni mjög ljúft þessa dagana. Skellibjöllurnar eru ekki heima og við pabbi erum bara ein og höfum það rólegt og óstressað.

Afmæli 28 júlí:
Tvær stórmerkilegar manneskjur eiga afmæli í dag sem mig langar að óska til hamingju!!

Hulda -"New York prinsessan" sem er búin að vera vinkona mín frá 2 mánaða aldri á afmæli í dag og er 26 ára. Til hamingju elskan mín og ég er að koma í heimsókn bráðum :)

Finnur- "Án efa skemmtilegasti skattstofuvinnumaurinn." Lyftingar, bandý- og sundfélagi með meiru er 27 ára í dag. Hann er karlkynsútgáfan af mér nema allt öðruvísi. Til hamingju með daginn :)

2005-07-27T13:29:00.000Z

Ég er þeirrar gæfu aðnjótandi að vinnu-glugginn minn snýr að nýja Radison SAS hótelinu í Hafnarstræti/Pósthússtræti sem hefur hýst margan frægan síðan það var opnað í maí. Núna er staddur hér á landi hópurinn Jim Rose Circus sem mun sýna listir sínar annað kvöld á Broadway. Sá hópur dvelur sem stendur á Radison og hefur spókað sig grimmt á tröppum hótelsins síðustu daga. Ég hef verið að dunda mér á dauðum tímum vinnunnar að virða fólkið fyrir mér. Í hópnum er einn gríðarfeitur maður sem er liðugur eins og köttur og hringar sig saman innan um keppina sína. Einn er það heppinn að hann getur föndrað þannig við typpið á sér að úr verður hamborgari. Tveir úr hópnum geta hengt þunga hluti í tungu og augnlok. Og svo eru tvær stúlkur, önnur er klámmyndaleikkona og getur farið í reipitog við typpi með klofinu á sér og hin kannski líka.. veit ekki en vonandi. Svo til að toppa allt þá fær einn heppinn áhorfandi að sofa hjá klámmyndakonunni.

....og ég sem í barnslegri einlægni eins og mér einni er lagið, ætlaði að fara með börnin í Sirkus.

2005-07-21T20:20:00.000Z

Er ekki svolítið undarlegt að taka þátt í spurningu plússins viku eftir viku í mörg ár og vinna aldrei 20 þúsund kall? Þetta er allt haugalygi! " Vinninghafi síðustu viku var 30 ára kona úr Kópavogi - BLA!"

Dúndur veður í höfuðborginni. Allir með bros á vör og grillspaðann á lofti, hleypa manni á undan í biðröðum og segja góða helgi við afgreiðslustúlkuna.. spurning hvað það endist lengi.

Ég mun fara á ótroðnar slóðir (inguslóðir) á morgun eða á Ísafjörð. Er bara orðin spennt. Hef heyrt að það sé ágætis-staður :-) En þarnæstu helgi munum við hjónaleysin fara í kærustuparaferð til Tallin. Það á að vera ágætis staður líka... Fyrsta skipti ein saman á erlendri grund síðan dætur okkar fæddust og það er ekki laust við að spennan sé að trylla mann. Þetta verður nú bara fárradaga ferðalag og planið er að hanga á sem flestum kaffihúsum, veitingastöðum, klúbbum, torgum og görðum á sem stystum tíma. Er eitthvað skemmtilegra??

2005-07-21T07:42:00.000Z

Tvöfalt morð á tjaldstæðinu!!

Það var maður drepinn á tjaldstæðinu mínu með stórum viðardrumbi af manninum sem leigði litla húsið. Allir karlmenn á tjaldstæðinu tóku sig saman og umkringdu húsið með kyndla og barefli. Einn var í Víkingasveitinni og tók upp byssu og hóf skothríð. Maðurinn í húsinu var því drepinn. Daginn eftir komu kona mannsins í húsinu og dóttir og ákváðu að fara degi fyrr heim. Ég var lengi að velta því fyrir mér þegar ég endurgreiddi þeim nóttina hvort ég ætti að endurgreiða þeim gistigjald látins föður og eiginmanns! Fær látið fólk endurgreitt???

Já þetta gerist víst þegar maður sefur!!

2005-07-16T12:21:00.000Z

Ég sendi þetta bréf fyrir nokkru síðan:

Kæri Dr Phil,
mig dreymir svo oft um fjöldamorðingja sem eru að elta mig og reyna að drepa mig. Þeir eru yfirleitt ómennskir að einhverju leyti. T.d gat einn stungið börnum upp í nefið á sér, sogið þau upp og tekið þau út um munninn á sér. Hann var reyndar svo hræðilegur að fólk var farið að grafa holur í jörðina og grafa sig lifandi því það var skárra en að lenda í þessari skepnu.

Annar fjöldamorðingi var úr þunnum málmi og þegar ég var að berjast við hann með búrhnífnum gat ég skorið hann í sundur en hann límdist alltaf saman aftur. Ég drap hann samt með því að taka af honum hjálminn sem hann var með og draga heilann á honum út.

Ég reyndi að drepa einn með hvítlauk, krossi og vígðu vatni. En allt kom fyrir ekki. Þetta virtist ekki duga á hann.

Hvað þýðir þetta Dr. Phil??

2005-07-11T07:36:00.000Z

Vá ég er orðin óð í blogginu.. 3 blogg á einum mánuði. Hlýtur að vera met. Helgin var frábær og margt afrekað á stuttum tíma.

Afrek helgarinnar voru:

*Ég og Karólína steiktum okkur á sundlaugarbakkanum á föstudaginn og verðum í "hvítu bikiníi" innanundir fötunum um einhvern tíma.

* baugar group lenti í 2 sæti á bandýmóti ÚÍA og á erfitt með að sætta sig við það að vinna ekki.

* Ég reyndi að telja marblettina sem ég hlaut um helgina en þegar ég var komin í 20 nennti ég því ekki lengur. Ég er m.a með marblett á rasskinninni og síðunni eftir Sindra Þorkels... takk Sindri minn :)

* Ég átti "flugmetið" á mótinu. Þ.e flaug mest á hausinn með hjálp annarra (aðallega Sindra og Danna) Ég átti reyndar líka markametið og er að spá í að útbúa handskrifaða og myndskreytta viðurkenningu handa mér fyrir það og hengja uppá vegg í vinnunni minni.

* Fórum í partý til Finns sem viðurkenndi þegar við komum að hann hefði "gleymt" að bjóða öllum strákunum ... Þetta var fyrsta djammið sem ég tek í sumar en örugglega ekki það síðasta.

*Fréttir herma að útsendari á vegum bandýnefndar Ísland hafi verið á bandýmótinu að leita að efnilegum leikmönnum í landsliðið.

2005-07-06T19:35:00.000Z

Egilsstaðir city!!
Það var dásamlegt að koma aftur til Egilsstaða eftir 2 daga ferð til glæpaborgarinnar Reykjavíkur. Vinaleg rigningin tók á móti mér á miðri leið í vélinni og bauð mig velkomna heim. Brosandi Kínverjar í jakkafötum biðu mín á flugvellinum og pollarnir á tjaldstæðinu mínu skemmtu sér konunglega þegar ég óð um svæðið að berja niður veðurbarða staura með stórum hamri. Já það er dásamlegt að koma heim!

Ég fór ekki á foo fighters tónleikana enda var ég í Grafarvoginum að baka tertu. Ég var alsæl og glöð og lagði mig alla fram á meðan gestir gerðu grín af mér. Sögur herma að þetta hafi verið ljótasta terta sem gerð hafi verið og var tekin mynd af gripnum eftir að hlátrasköllin dóu út. Ég mun aldrei giftast; ömurlegur bakari, grænmetisæta og fátæk!!

2005-06-28T15:23:00.000Z

Blóð, skítur og æla:
Já þessi þrjú óskemmtilegu orð koma sterklega upp í hugann þegar ég hugsa um helgina.

1. Blóð. Einfaldlega vegna þess að blóðnasirnar hafa verið nokkrar undanfarið. Ég var á hlaupabrettinu um daginn og fékk blóðnasir, ég setti á pásu á brettinu, náði í pappír, tróð honum í nösina á mér og hélt áfram. Sumir segja geðveik, ég segi bara að ég læt þessa fötlun mína ekki stjórna lífi mínu.

2. Skítur. Það var hundhelvíti sem gekk laust á tjaldstæðinu sem drullaði út um allt. "Greyið" var eitthvað slæmur í maga þannig að skíturinn var vatnskennd drulla sem lyktaði eins og holræsi í helvíti. Ég fór á svæðið með æluna í hálsinum og latexhanska og reyndi að skófla skítnum upp í pokann. Hundurinn horfði á mig með stórum hvolpaaugum á meðan þannig að það var erfitt að vera reiður við helvítið.

3. Æla. Ég átti hræðilegan dag á föstudaginn. Ég byrjaði á því að læsa mig úti á meðan ég lá í sólbaði. Um 2 leytið varð mér geðveikt óglatt og varð að fara inn að æla, það þoldi enga bið. En þar sem ég var læst úti þurfti að ég að troða mér inn um búrgluggann sem er nú ekki alltof stór. Ég var hangandi í gluggakarminum til sýnis fyrir nágrannana heillengi því það var erfitt að reyna að troða mjöðmunum í gegn. Ég rétt komst inn á baðherbergi áður en ég ældi. Ég ældi 10 sinnum um daginn og var hreinlega rúmföst. Það versta er að þennan dag var einmitt kökuveisla í vinnunni til heiðurs afmælisbarna vikunnar (mér til dæmis:) ) sem ég neyddist að láta framhjá mér fara.

Ég vona að orðin 3 fyrir næstu viku verði geðslegri og fallegri :)

Ég minni á bandýæfingarnar á Egilsstöðum í sumar!!

2005-06-21T11:47:00.000Z

Algerlega glaðvöknuð! Ég ætlaði bara að gefa systrunum færi á að tjá sig. Annars vil ég fá fréttir af U2. Er sjálf hress, litla barnið mitt er 1 árs í dag og foreldrarnir verða uppteknir allan afmælisdaginn.

2005-05-11T15:23:00.000Z

Mig dreymir atvinnuumsóknir. Um daginn dreymdi mig að ég hefði saumað mér kjól úr þeim umsóknum einstaklinga sem ég hef þurft að neita um vinnu. Mig dreymdi líka fyrir stuttu að ég hefði verið í sturtu og úr sturtuhausnum streymdu atvinnuumsóknir í tonnatali. Eitt skiptið dreymdi mig að myndirnar í ferilskránum fóru að tala við mig og spyrja út í launakjör og önnur praktísk atriði. Ég held að ég sé að missa vitið og að eina ráðið þessa helgi sé að koma sér eins langt úr borginni og hægt er. Verst að það er ekki komið útileguveður.

2005-05-02T18:50:00.000Z

Aldeilis ágæt helgi. Tókst að hitta eina af mínum uppáhaldsfjölskyldum - Kúbufjölskylduna. Það er hópur ungmenna sem eiga það sameiginlegt að hafa lagt leið sína til Kúbu árið 1999 og skemmt sér framar öllum vonum. Þau hittast svo reglulega yfir Mojito og borða saman kræsingar sem matreiðslumeistarar fjölskyldunnar laða á ótrúlegan hátt fram. Því miður komst ég ekki með til Kúbu þar sem ég var fjarri góðu gamni (reyndar ekki í slæmu gamni sjálf) sem Au-Pair í London en var ættleidd á sínum tíma inn í fjölskylduna. Meðal umræðuefnis var áætluð "kúbuferð" til Brussel næsta vor til Ellu. Hingað til hafa Kúbuferðir ekki verið lengri en upp í sumarbústað en markmiðið er auðvitað að komast alla leið til Kúbu og þá ætla ég með :-) Daginn eftir dró ég fjölskylduna mína með á Snæfellsnes þar sem við lentum í snjóbyl.

2005-04-30T12:46:00.000Z

Já við systurnar erum ekki alveg þær duglegustu í skrifunum enda hefur maður voðalítið að segja á þessum erfiðu tímum... þ.e prófatímum. Ég mútaði kærastanum mínum að ég kæmi sko ekkert í heimsókn til hans um helgina því ég þyrfti að vera að læra svo mikið nema hann myndi algerlega sjá um mig á meðan. Hann þorði nú ekki annað en að lofa því og nú eldar hann ofan í mig, gengur frá eftir mig, vaskar upp, réttir mér vatnsglös eftir þörfum, kaupir nammi handa mér og fleira og fleira. Ekki amalegt það;) Hann meira að segja fór á fætur með mér klukkan 9 í morgun og það er laugardagur til að sýna mér andlegan stuðning.
Ég fer austur í sumar og er að spá í að reyna að finna fólk til að æfa bandí svona 2 í viku með mér. Ef einhver þekkir einhvern sem er til er um að gera að láta vita. Mér finnst líka alveg lágmark að Austrið verði ef lið ef við náum að stofna deild sem nú er í bígerð og að Austrið verði með á næsta Íslandsmeistamóti!!!
Jæja lærdómurinn kallar og kellan kveðjur...

2005-04-17T21:19:00.000Z

Það er nú gott að Inga litla sér um að halda þessari síðu lifandi... ekki gerum við systurnar það. Ég man sjaldnast eftir því að þessi síða sé yfirleitt til :D. Þarf að fara að hugsa upp eitthvað vitrænt til að segja, það er bara ekki alveg að gerast núna þar sem ég er hálf heiladauð yfir ritgerðasmíðum. Skólaárið fer að renna sitt skeið og syngja sitt síðasta og ég get ekki beðið eftir sumrinu. Hlakka ýkt til, verð að gera fullt af skemmtilegum hlutum, og sé fyrir mér að verða mikið fyrir austan. Það er æði. Ein tónleikaferð til Englands plönuð og svo er ég að fara í viku gönguferð um Lónsöræfin með skvísunum mínum.. þetta verður bara dásamlegt. Bið að heilsa í bili

2005-04-14T21:02:00.000Z

Ég held að Film Festival sé úr sögunni hjá okkur. Við erum búin að þurfa pössun á hverjum einasta degi þessarrar viku og þeirrar síðustu. Allt vegna veikinda barna okkar, veikinda dagmömmunnar,veikinda sonar dagmömmunnar og yfirvinnu okkar :( Það verður bara að vera videó. Núna er Rakel veik og áðan þegar ég kom inn til hennar þegar hún var að gráta, spurði ég af hverju hún væri svona leið.. þá svaraði hún: "mamma, ég er bara að brynna músum".. ég þurfti nú bara aðeins að staldra við og rifja upp hvern fj. það þýddi aftur... jah ekki lærir hún þetta hjá okkur foreldrunum.

2005-04-08T09:32:00.000Z

Iceland Film Festival!
Langar að sjá um 20 - 30 myndir en þar sem ég á 2 börn og 1 mann þá gengur það ekki. Verð samt að sjá: Melinda and Melinda, La Mala Educacion og Motorcycle Diaries. Ef einhver vill sitja eina kvöldstund yfir börnunum mínum þá fær hinn sami pening fyrir spólu og snakki og 1000 kjell í vasann?? hmm? :-)

2005-04-06T16:32:00.000Z

Sumar reglur eru alveg stórfurðulegar.
Í flugvél þarf sætisbak og borð að vera upprétt, gluggaskermur uppi, beltin spennt, handfarangur undir sætinu fyrir framan eða uppi í farangursgeymslu, það má ekki vera barnastóll inni í vélinni ef ef það er gerð undanþága þar þá verður þú að halda á barninu í flugtaki og lendingu, stærri farangur þarf að fara í sérstaka geymslu svo hann verði ekki fyrir ef einhver ógæfa dynur yfir, slökkt verður að vera á farsímum og engin tæki sem senda frá sér útvarpsbylgjur mega vera í gangi...

..... þú sjálf/ur mátt samt sem áður vera algerlega PISSFULL/UR. ?! Er þetta ekki svolítið undarlegt?

2005-03-23T14:17:00.000Z

jebbsí pepsí...
Gleðilega páska.

2005-03-19T18:43:00.000Z

Jæja..... Hvað er að frétta? Maður heyrir ekkert og sér ekkert frá hálfsystrum sínum, og við sem ætluðum öll að kaupa okkur íbúð í sömu blokkinni og rölta á milli, fá lánaðan sykur og salt og svoleiðis.. er það nokkuð dottið uppfyrir?

Héðan af Hagamel er samt sem áður allt gott að frétta. Búin að vera í svakalegum framkvæmdum, parket komið á allt, svissun á svefnherbergjum og þetta er þvílíkur munur. Ekki bara á íbúðinni, heldur líka á skapgerð heimilismanna. Það er allt svo ferskt, allt hvítt og hreint.

Vinnan er það sem tekur mesta tímann, hvort sem maður er þar eða ekki. Það er mikið að gera og ég er farin að fá kvart frá fjölskyldu og vinum hvað ég vinn mikið og er stressuð. Ég er svo sem ekkert stressuð finnst mér, en í nótt dreymdi mig ráðningar og uppsagnir, gleði og grát og hvar ég ætti að koma þessum sumarmanni og hvar ég ætti þá að koma hinum sumarmanninum. Ég vaknaði hálfstressuð og fannst ég þurfa að skreppa í vinnuna til að redda öllu, en ákvað svo að hætta þessu rugli, njóta helgarinnar með fjölskyldunni, því helgarnar eru ekki á hverjum degi. Og núna er ég bara mjög afslöppuð, þó svo að vinnan troði sér inn einsöku sinnum.

Ég fékk fréttir fyrir helgina sem gera það að verkum að maður vill minna alla á að taka fólkið þitt í kringum þig ekki sem sjálfsagðan hlut. Það er ekki sjálfgefið að allir sem þú þekkir verði hér á morgun svo að vertu dugleg/ur að segja öllum hvað þér þykir vænt um þá. Góða helgarrest :)

Svo vil ég fara að fá ykkur frænkur mínar í heimsókn :)

2005-03-09T16:01:00.000Z

Jæja.. ég ákvað að loka blogginu mínu. Það kom þarna tímabil sem ég hafði frá svo ótalmörgu að segja og langaði að deila því með öllum en svo kom sá tímapunktur að mig langaði þess ekki lengur. Svo ég bara hætti. Núna er ég farin að vinna, heimavinnuhamingjan er búin enda kominn tími til. Ég er búin að vera heimavinnandi síðan 20 ágúst 2002, fyrir utan 2 mánaða vinnu sumarið 2003. Við erum að tala um 2 og hálft ár og það er óhætt að segja að það sé meira en nóg. Vinnan er frábær - ég er það ánægð að MS námið sem ég hafði fyrirhugað í haust er í endurskoðun (við þurfum að ræða það Magga :)). Skemmtilegar, vel borgaðar vinnur eru ekki á hverju strái ... getur maður ekki alltaf farið seinna í skóla?? En núna er ég að fara að leika með strumpana, held að planið sé að láta þá alla dansa í kringum jólatréð.

2005-02-16T16:46:00.000Z

Þá er ég búin að taka út djamm fyrir næstu 3 mánuðina. Er búin að djamma hverja einustu helgi frá áramótum, og er því dauðfegin að mamma er að koma á föstudaginn. Hún mun að sjálfsögðu gista uppí hjá mér, og ég efast ekki um að við munum skemmta okkur gríðarlega vel og finna okkur margt til dundurs. Höfum gott í matinn og með matnum og svona... Soffía er allavega búin að heimta að hún baki bolludagsbollur handa okkur, þar sem við fengum engar á bolludaginn, allavega ekki ég, en ég frétti þó að hún hafi rassskellt kærastann og krafist því af honum að hann gæfi sér bollur í staðinn.
Við héldum brillíant starfsmannapartý um daginn heima hjá Öllu og Gústa úti á Nesi. Við vorum búin að kría út áfengi hjá öllum birgjum, þannig að það má með sanni segja að við vorum vel birgð. Spiluðum Actionary, þar sem skipt var niður í lið, stelður á móti strákum. Rústuðum strákunum að sjálfsögðu, en svo komu Árni og Óli og þá var ekki alveg jafn gaman að þessu... Endaði niðri í bæ, á Ölstofunni þar sem ég hitti Röggu og Hrenna, fórum svo á REX þar sem ég gerði góða hluti. Endaði kvöldið á að húkka mér far með einhverjum piltum og lét þá skutla mér inn í Arnarfjörð, af því að ég ætlaði að labba heim!!
Um seinustu helgi var Stuðmannaball í Fífunni og ég fór þangað með Írisi og Þrúðmari og einhverjum frænda sem átti að koma mér saman við. Var nú ekki á þeim buxunum frekar en fyrri daginn en skemmti mér heví vel.
Annars er ég núna að dánlóda U2 og REM, því að tónleikaferðin mikla okkar Þóru er á næsta leyti. Hún byrjar á REM tónleikum í Manchester á þjóðhátíðardaginn okkar. Svo verður haldið upp á afmæli systur minnar á U2 tónleikunum, eins og ég held að hafi áður komið fram hér á þessari síðu.
Þykir verst að geta ekki tekið Spíjuna með, því það átti víst að skapa hefð fyrir þessu, en hún verður hjá mér í anda;)

2005-02-11T13:40:00.000Z

Í heimsókn hjá Gro Harlem Brundtland
Nú styttist óðum í Noregsförina 11-13 mars þar sem ég og 2 bandýstrákar ætlum að skella okkur á bandýþjálfaranámskeið í boði ÍSÍ og Íþróttasambands Noregs! Nokkuð gott. Gro Harlem Brundtland tekur á móti okkur á flugvellinum og um kvöldið verðum við á einkatónleikum hjá Morten Harket og Eiríki Haukssyni sem kyrja norsk þjóðlög okkur til heiðurs!

Mósa systir er að fara á U2 tónleika á afmælinu mínu í sumar og ég er að springa úr afbrýðisemi. Ég var einmitt að spá í að búa til hefð og fara alltaf á stórtónleika á afmælinu mínu eins og ég gerði í fyrra þegar ég fór á red hot chili peppers. Það er hins vegar uppselt á U2 tónleikana og sökum fjárskorts lítur út fyrir að stórtónleikar ársins í ár verði Skítamórall eða Írafár nema seðlarnir fari að streyma inn!

Meistarinn mikli!!
Það er alltaf kúl að sigra í íþróttakeppnum og því get ég sagt með stolti að ég (ásamt 6 öðrum yngismeyjum í skólanum) er keilumeistari kvenna á Laugarvatni og fræg fyrir hinn sérstaka snúningstíl! Heyrst hefur að stúlkur frá Bifröst hafi farið ófrjálsri hendi um Keiluhöllina og stolið 6 pörum af keiluskóm og bleikri keilukúlu... hvurslags er þetta!

2005-01-27T10:18:00.000Z

JEI!! Á sama tíma á morgun verðum við Ingibjörg að fljúga á vit ævintýranna. Kannski reynum við að fá okkur kríu svo að við verðum eins úthvíldar og hægt er undir þessum kringumstæðum.. þá er ég að tala um vakna svona snemma og s.v.frv. Annars hef ég aldrei á ævinni eytt jafn miklum peningum í lækna eins og mér hefur að tekist að gera núna undanfarnar 3 vikur. Útbrotið mitt góða kostaði mig ca 30 kall!!!!! og ein pínulítil hola í tönn, sem ég fann ekki fyrir og sást ekki með berum augum kostaði mig 23 spírur!! Hugsið ykkur, þennan pening hefði ég vel getað hugsað mér að nota í eitthvað þarfara!! Ég er hneyksluð á því að svona nokkuð skuli viðgangast í þjóðfélagi voru, og ég verð bara að segja það að ég þakka guði fyrir að vera svona þokkalega hraust!!! Maður hefði ekki efni á öðru. En ég er sífellt að verða meira og meira á því að giftast tannlækni, fyrst ég nennti ekki að verða það sjálf, þó að pabbi reyndi sitt besta til að ýta mér í þá átt. Maður á að hlýða foreldrum sínum, munið það, þau hafa oftar en ekki rétt fyrir sér!

2005-01-26T10:35:00.000Z

Og það styttist í Köben hjá okkur Margréti. Fljúgum út klukkan 7:30 á föstudagsmorguninn með tómar töskur, lendum klukkan 11:40. Við höfum 48 klukkutíma til að fylla okkur og töskurnar og komum svo endurnærðar heim. Getur ekki klikkað og ég hlakka mikið til :)

2005-01-25T13:06:00.000Z

Íþróttameiðsli!!
Er ekki svoldið kúl að verða fyrir íþróttameiðslum? Mér fannst systir mín kúl að fótbrotna á skíðum og það er svoldið töff að togna í hita leiksins í fótbolta eða körfubolta. Ég er hins vegar ekki alveg jafn kúl þegar það kemur að mínum meiðslum eins og sést hefur síðustu 2 vikurnar. Ég byrjaði á því að togna í úlnliðnum í þeirri stórhættulegri íþrótt sem nefnist blak og í gær tábrotnaði ég þegar ég var í sundi að æfa baksund en það er allra sunda hættulegast eins og alþjóð veit.

2005-01-23T11:01:00.000Z

Get bara ekki orða bundist yfir geggjaðri helgi :P Á föstudagskvöldið kom ég heim eftir vinnuna, dauðþreytt, lagðist upp í sófa og horfði á alla vinina sem ég fékk lánaða hjá Ingu um daginn. Til stóð að hitta skvísurnar úr Vínbúðinni á laugardagskvöldið og spila, m.a Friends-spilið, en þar sem Dísa litla beilaði (hún er sú í hópnum sem á sér einna mest líf...) fór ég í rúmfatalagerinn og keypti mér gardínuefni og saumavél og var allt kvöldið að sauma og strauja gardínurnar :) Ég veit að Einar frændi gleðst yfir að heyra þetta, og má hér bæta við að ég er búin að skila kökuformunum;)
Svo stóð til að fara á skíði í dag, en vegna dræmrar þátttöku sýnist mér ekkert ætla að verða úr því. Er að hugsa um að nota daginn og lesa allt námsefni vetrarins í "Efnahagslíf og samfélag", bara svona til að fullkomna frábæra helgi:D. Þess má ef til vill geta að akkúrat núna er ég að horfa á (það er kveikt á) Laugardagskvöld með Gísla Marteini á RÚV...
Jakk, bjargið mér áður en það er um seinan......................................

2005-01-14T09:44:00.000Z

Elsku frænkurnar mínar. Ég er sko ekki farin neitt langt. Ég er endilega til í að skrifa hérna eitthvað en þá verða vinir og vandamenn að hætta að bögga mig :) Að því að ég er greinilega með meira málæði en þið, þá bjó ég til mína eigin síðu þar sem ég get blaðrað á hverjum degi. Þetta verður svona spari :)

Ég er líka byrjuð í átaki. Mesta átak sem ég hef farið í í 27 ár. Lokaður tími með fáum konum, mælingar, matardagbók og markmiðasetningar og þótt ótrúlegt sé, ..mjög gaman. Það er alltof langt síðan ég hef hreyft mig og kominn tími til að ná 2 óléttum af mér. Ég var eins og auli í gær, hrikalega taktlaus, rauð eins og epli og svitinn dropaði af mér. Ég hélt bara að ég ætti þetta ekki til. Og í morgun eftir að ég var búin að taka Rakel Birtu til í leikskólann þá fór ég EKKI aftur upp í rúm að sofa. Það er líka langt síðan það hefur gerst. Svo þegar ég er komin í gott form, þá ætla ég að taka Soffíu frænku mér til fyrirmyndar og hlaupa þangað til fer að blæða úr andlitinu á mér!

Já Köben-ferðin verður sko fín! Hlakka mikið til að fara í flugvél og geta bara setið og t.d. lesið, eða horft út í loftið... ekkert hnoð, bleyjuskiptingar, heimt, pirringur o.s.frv. ... Ekki nema að Magga sýni á sér nýjar hliðar....... Ferðin er samt sem áður í stysta lagi, gat ekki hugsað mér að vera lengur því ég hef aldrei prófað að vera meira en sólarhring í burtu frá krílunum. ÞEtta ætti nú samt að sleppa :) Bara 2 vikur.....

2005-01-13T21:42:00.000Z

Fór með Göngu-Hrólfi í sund í gær. Það hefur ekki gerst (að ég actually syndi, sko, fer stundum í pottinn) síðan í 10. bekk hjá Helgu þýsku Hitlersdóttur. Mér tókst að synda 500 metra, án mikilla vandkvæða, og ég er stolt af því afreki. Vaknaði þó í morgun með sárar harðsperrur, enda ekki vön þessum hreyfingum... Í lauginni kynntist ég strák frá Boston sem er að vinna á Íslandi og besta vinkona hans er Sunna vinkona mín sem bjó í sömu götu og ég öll okkar æskuár. Lítill heimur ekki satt??
Er búin að púsla saman flottustu stundatöflu í heiminum, ég er mjög ánægð og mun eiga náðuga daga í HÍ seinustu önnina mína JEI. Gleði, gleði, gleði... kominn tími til, finnst mér. Vildi að ég gæti byrjað upp á nýtt í þessu námi, þá hefði ég gert þetta öðruvísi, valið önnur fög úr öðrum deildum... raunvísindadeild er ekki góð deild. Þó að það hljómi óneitanlega ferlega töff og nördalega að vera í raunvísindum, hehe.
Er annars búin að afreka ferlega lítið síðan ég kom hingað í borgina ógurlegu, hef ekkert verslað á útsölum nema íþróttabuxur sem voru ekki á útsölu og þráðlausan heimasíma sem var ekki heldur á útsölu. HALLÓ!!!!
Bíð spennt eftir næsta mánudegi því þá mun lífið aftur taka á sig rétta mynd. Þá byrjar rútínan aftur, skólinn, ræktin, vinnan og svona. Þá ætla ég að byrja í átakinu af alvöru. Ég er farin að skrifa heilsudagbók, þar sem ég neyðist til að játa allar syndir mínar hvað varðar sælgætisát, áfengisneyslu og þannig sukk. Það er ekki falleg lesning, skal ég segja ykkur. En mun vonandi hvetja mig áfram í baráttunni við sælgætisdjöfulinn.
Það eina gleðilega framundan er Kaupmannahafnarferð okkar Ingu frænku. Þar verður verslað eins og við eigum lífið að leysa alla daga, og á kvöldin verður innbyrgt eitthvað magn af dönsku öli. Vonandi að Zophonías hinn danski sjái sér fært að hitta okkur í borginni, en hann er víst því miður í námi þessa helgi. Væri gaman að kíkja á aðstæður í skólanum hans, en efast um að við höfum tíma til þess vegna kaupæðisins sem ég hef grun um að heltaki okkur strax í Leifsstöð, - á leiðinni út.
Held ég hafi ekki sagt það áður, en ég er ekki ánægð með þá ákvörðun Ingibjargar að segja okkur systrum bara upp, svona fyrirvaralaust. Ég fattaði aldrei neitt, hélt að það væri allt í himnalagi, svo stingur hún mann bara í bakið þegar maður á síst vona á...
Snökt.

2005-01-11T14:55:00.000Z

Inga það er BANNAÐ að yfirgefa síðuna.. hvernig geturðu gert okkur það. Ég lofa að fara að skrifa aftur BARA til þess að fá þig aftur þó ég hafi nákvæmlega ekki neitt að segja :(

Allt gengur sinn vanagang... við erum komin aftur á Laugarvatn og mig er farið að dreyma einkennilega drauma aftur inn í þessu húsi þó að Sigfús húsdraugur hafi ekki náð að hrekkja mig hingað til. Ég held að hann hafi átt einhvern þátt í ófærðinni á leiðinni sem varð til þess að við Elva komumst nær dauða en lífi aftur á Vatnið eftir skaðræðisferð. Stuttu eftir að á áfangastað var komið lægði og aðeins um skæðadrífu að ræða.

Nokkrir menn hafa fengið inngöngu í manager liðið mitt og má þar nefna Alan Smith úr Man Utd og Joe Cole úr Chelsea sem eru vel til hlutverksins fallnir. Föður mínum fannst þessi skyndilegi ofuráhugi á enska boltanum yfir jólin frábær og skemmtum við okkur saman við að horfa á leiki og hvetja okkar menn áfram.

2005-01-09T16:16:00.000Z

Það er náttúrulega ekki hægt að láta Iddibödduna fá samviskubit yfir einokun, þannig að ég ákvað að segja hér í stuttu máli frá mínu daglega amstri undanfarið...
Er tiltölulega nýkomin heim úr jólafríinu (HEIM!!! hingað í borg óttans.. heima er þar sem draslið mitt er -og talvan audda;)). Það var allavega étið og drukkið mikið um jólin, mikið horft á sjónvarp, lesið og sofið. Enda var varla hægt að fara útúr húsi sökum óskapaveðurs, það var rok, hálka, riging og snjór.. Við mamma gerðum tilraun til að labba einn hring, en gáfumst upp, fórum heim og bjuggum ( okey, hún bjó) til vöpplur. Lufsaðist þó á áramótaballið og skemmti mér konunglega. Alltaf gaman að hitta sveitunga sína, sérstaklega þegar allir eru hýrir á brá. Við systur fengum nágranna til að styðja okkur heim að loknum dansleik, því það var algjörlega óstætt úti sökum roks og hálku. Hann stóðs sig með prýði og skilaði okkur heilum höldnu heim :)
Nú er mesti hausverkurinn að púsla saman stundatöflunni og velja kúrsa.. arrrrghh, ekki gaman.
Í gærkvöldi var ég að vinna á barnum á árshátið hjá karlakórnum Þröstum. Það var held ég eitt af því fyndnasta sem ég hef lent í lengi. (Segir það sitt um áhugavert og skemmtilegt líf mitt).
Allavega.. sleppti við Þórmerkurferð með Sveini nokkrum Guðjónss útaf vinnu.. veitir ekki af aurunum.
Læt heyra í mér næst þegar ég nenni... ble

2005-01-07T13:08:00.000Z

Jæja... þar sem mér hefur verið bent of oft á að innrás mín á vef syndugu systranna hafi gert það að verkum að nú heyrist ekki múkk frá þeim... þá dreg ég mig hér með úr félagsskapnum og vona að við förum að heyra einhverjar syndir aftur. Takk fyrir samveruna systur.... ég á samt sem áður eftir að kíkja daglega og kommenta eins og kreisí.

www.iddibadda.blogspot.com
Þessi síða var stofnuð í sumar, ég nennti náttúrlega aldrei að skrifa en nú ætla ég hér með að blaðra eins og ég vil um allt og ekkert án nokkurs samviskubits yfir einokun :)

Leiterspeiter

2005-01-04T14:58:00.000Z

Ég ákvað það á gamlársdag að hætta þessum árlegum pælingum um hvort ég eigi að gerast styrktarforeldri barns og sló til. Núna fær Apiyo Ketty 10 ára stúlka frá Uganda að njóta skólagöngu og læknisaðstoðar vegna 950 króna sem teknar eru af mér á mánuði. Mamma hennar var drepin af uppreisnarmönnum í fyrra og pabbi hennar hann Alfonsio sem er smábóndi, fól móðursystur Ketty, henni Santa, börnin því hann getur ekki annast þau. Hún sér um 5 aðra munaðarleysingja, þar af 2 systkyni Ketty.
..... ég segi nú bara, af hverju var ég ekki löngu búin að þessu??......

2005-01-03T14:35:00.000Z

Gleðilegt nýtt ár og takk fyrir gamla.
Núna er síðasti fuglinn floginn úr hreiðri foreldra minna og það var ekki laust við að það væru blendnar tilfinningar í gangi þegar ég heyrði í pabba í morgun. " Jú jú þetta er náttúrlega spennandi, en maður er strax farinn að sakna hans". Zoffi bróðir yfirgaf okkur fyrir Danmörku kl 7:30 í morgun þar sem hann mun dvelja eitthvað inn í sumarið. Ég var á báðum áttum í morgun þegar ég kvaddi hann hvort ég ætti ekki bara að hoppa með, koma honum á leiðarenda, búa um hann og pakka upp úr töskunum. Þeir sem þekkja Zoffa vita að hann hefur aldrei gert neitt þessu líkt - en hefur aftur á móti lengi langað og finnst mér hann eiga hrós skilið fyrir kjarkinn að skella sér. Mestu áhyggjurnar hef ég samt af því hvernig hann þvoi þvottinn sinn. Ég veit nefnilega ekki til þess að hann hafi gert svoleiðis. Ætli hann stafli þessu ekki bara inn í skáp og bíði svo eftir að Sandra komi í heimsókn, ég vona það eiginlega svo að hann fari sér ekki að voða.

Veikindi herja á fjölskylduna enn einu sinni og hafa gert það nánast allar hátíðirnar. Þetta er orðin helst til þreytandi og fjölskyldumeðlimir orðnir frekar þreytulegir með stóra bauga.

Ég ákvað að strengja 2 áramótaheit. Ég er reyndar ekkert fyrir svoleiðis því sjálfsaginn er enginn hjá mér og ég man ekki eftir að hafa nokkurntíma klárað janúar án þess að áramótaheitið væri horfið út í veður og vind. Núna ákvað ég að hafa þetta svolítið opið svo það sé kannski hægt að svindla pínu. Á árinu 2005 ætla ég að hugsa betur um heilsuna og lesa meira. Engar skuldbindingar hvernig ég ætla að hugsa betur um heilsuna né hversu margar bækur ég ætla að lesa á árinu.... Ég held að ég standi mig bara vel.

2004-12-29T11:50:00.000Z

Ég fékk bréf fyrir viku síðan frá Jill (stelpa sem ég kynntist úti á Spáni). Hún var að flytja til Kóreu og verður þar að kenna í eitt ár 5-6 ára börnum. Hún var svo svekkt því allt kennaraliðið var búið að panta sér ferð til Tælands yfir hátíðarnar en af því að hún kom svo seint, komst hún ekki með þeim. Svo fékk ég aftur bréf í dag þar sem hún segir að helmingurinn af kennurunum sé "missing".................... svo er ég að svekkja mig á því að mjólkin í teið mitt sé búin og ég nenni ekki að labba út í búð af því að það er rok og rigning........................

2004-12-28T11:07:00.000Z

Mig langaði að taka undir með Hörpu vinkonu minni harpahronn.blogspot.com að taka símann, hringja í 907-2020 og senda 1000 kall í hjálparstarf Rauða Krossins í SA-Asíu. Held að allir hafi gott af því eftir jólin.

Við erum komin í bæinn aftur. Fengum fullt af pökkum, borðuðum MJÖG mikið, höfðum það stórgott og ég er að sjálfsögðu búin að hringja í 907-2020....

Gleðileg jól.

2004-12-21T16:29:00.000Z

Til hamingju stelpur að vera komnar í skóla-jólafrí :) Hlakka til að sjá ykkur um jólin.
Annars er ég bara komin í sveitina, ofsalega notalegt að gera ekkert og þá finnst mér sérstaklega gaman að þurfa ekki að elda neitt :) Stelpurnar, þá sérstaklega Rakel Birta er himinlifandi að vera komnar hingað og Rakel er í þessum töluðu orðum að þramma um gólf og syngja" I am crazy bestur, yes I am, I am crazy bestur, yes I am..... uppáhaldslagið hennar. Það náði yfirhöndinni í dag eftir að nómanómajei, nómanómanómajei datt niðrí annað sæti.

2004-12-17T14:20:00.000Z

Stelpur, við kunnum greinilega ekki að blogga! Var að lesa blogg 14 ára frænku minnar:

""Sælt verið fólkið :p veit ég er ekki buinn að blogga mikið nuna enn sóóó marrh les einginn etta bull kortiðer :p ÞAÐ ER LAUGARDAGSKVELD OG ÉG ER Í MASSHÍVUM FÍLING :D:D:D:D Jæjjja í dag gerði ég markt og mikið skemmtilegt :p hehe ég fór til xxxx sæduhh umm eitt leitið og við vorum brah eikkað á tjillinu enn hun þurfti að fara í ammæli til xxxxx 2. timum eftir að ég kom sem ég vissi ekki aleg af enn jæja.... já soo labbaði ég bara heim og eikkað so var ég bara á msn eikkað á tjillinu og horði á eikkerja mynd og sohhna .... ""

Massa fyndið!!!!

2004-12-15T14:36:00.000Z

Úfff... ég er ekki í nógu miklu jólaskapi þessa dagana - eins og það var nú svakalegt í byrjun des. Það hafa herjað veikindi á heimilið í tæpa viku sem einkennast af gubbi, hita, hausverkjum og fleiru. Það orsakar svo svefnlausar nætur, pirring, mikið kaffi, drasl, hrúgur af óhreinum þvotti, náttföt allan daginn og leti. Mitt í þessu öllu stendur jólatréð fullskreytt.. það á bara einhvernvegin ekki við núna. Ef einhver nennir að klára jólagjafainnkaupin fyrir mig og henda í nokkrar vélar þá er það vel þegið.

2004-12-09T10:08:00.000Z

Barnaland.is er upplýsinga/auglýsinga/umræðuvefur fyrir foreldra.. mömmur aðallega þar sem hlutir eru auglýstir og skipst er á skoðunum um hin og þessi mál. Ég fer oft þarna inn og skoða í gengum auglýsingarnar sem innihalda allt milli himins og jarðar.. allt barnadót auðvitað en líka bíla, hús, herbalife að sjálfsögðu, föt og núna er allt að verða vitlaust á vefnum því allir eru að selja eitthvað til að eiga fyrir jólunum. Ég t.d. auglýsti Diesel gallabuxurnar mínar þarna inni sem ég er búin að bíða eftir í 3 ár að ég komist aftur í.... en ég er búin að sætta mig við að það gerist ekki. Það er þvílík umferð á þessum vef og gersamlega slegist um gallabuxurnar mínar, eins og allt annað á þessum vef. En það sem merkilegast er, að inni á barnalandi.is nota konur tækifæri undir nafnleynd og slást með kjafti og klóm (þó aðallega kjafti). Þarna hafa myndast "barnalands-gengi" sem standa saman á móti hinum "kellingatussunum" þar sem allt og allar milli himins og jarðar eru rifið niður og traðkað á. Sumar umræður þar sem nokkrar konur skiptast á blótsyrðum út í hvor aðra geta varað í marga daga og oft eru einhverjar útskúfaðar út úr genginu. ´Hver kona hefur sitt "nikk" og um leið og óvinsæla nikkið signast inn byrjar skítkastið. T.d. sá ég eina umræðu sem var búin að standa í einhverja daga sem byrjaði svona: "Stelpur, finnst ykkur ég leiðinleg týpa hérna inni :´(" Ég varð náttúrlega að skoða hvernig ein svona spurning gat orskað svona langa umræðu (Harpa, mannfræðipæling handa þér!!) Flest öll svörin voru "nei alls ekki elskan mín" en svo kom eitt "já!" ... þá var krafist rökstuðnings á jáinu og þetta gekk sem sagt svona í laaaaaaaangan tíma. Mér finnst þetta náttúrlega bara fyndið því eins bjánalegan "girlfight" hef ég aldrei séð. Næstum jafn fyndið og þegar umræðan snýst um: "kallinn minn er svo ööööööööööömurleguuuur" :) Alltaf jafn fyndið! Ohhh hvað ég er ánægð með lífið!

2004-12-07T21:31:00.000Z

Talandi um blessuð jólaprófin.. Ég get bara ekki orða bundist, en verð að lýsa ánægju minni á þeim stuðningi sem Ríkissjónvarpið veitir okkur, nemendum. Ég reyndar horfi aldrei á RÚV, en núna þegar maður á að vera að lesa þá reynir maður að sjálfsögðu allt til að komsat hjá því og liggur beinast fyrir að horfa á sjónvarpið...
En RÚV sér nú til þess að manni verður ekki kápan úr því klæðinu. Með sérstaklega óáhugaverðri sjónvarpsdagskrá gerir RÚV það að verkum að miklu heldur les ég þessar skelfilegu námsbækur. Í gær var Bresk-sænskur þáttur um ofnotkun lækna á pensilíni, og í kvöld er norskur þáttur um fyrstu konuna á Norðurlöndum til að gerast biskup!! Er spurning um hvað maður gerir í kvöld????? Er þessi fyrirhyggjustefna ekki bara af hinu góða? HA??
P.s. Og haldiði að biskupsfrúin taki ekki bara við embætti í alveg eins peysu og amma á Mýrum á, þessari með rauðu og gulu röndunum á ermunum.... BRILL

2004-12-07T21:28:00.000Z

Stórgott hjá þér Soffía :) Halli er allur í þessum pakka líka, ég held að þið ættuð að styðja hvort annað í að koma öllum ljóðunum út fyrir næstu jól.

Þriðjudagur: Dagurinn minn þegar ég fer út án manns eða barna og geri eitthvað fyrir mig. Hingað til hef ég verið frekar dugleg, farið nokkrum sinnum í bíó, á kaffihús, á fyrirlestur og alltaf í góðum félagsskap. Í kvöld talaði ég við engan. Mér datt bara enginn í hug að gera neitt með... mér finnst allir vera uppteknir að læra eða vinna eða vera heima með kærustunum og börnunum og ég vildi ekki trufla neinn........ svo að ég fór ein á bókasafnið. Ég þurfti virkilega á ró og frið að halda eftir daginn og ég hefði geta eytt öllu kvöldinu á bókasafninu - ein. Þetta er örugglega einn sá mest róandi staður í Reykjavík. Eftir að ég var búin að fylla pokann af blöðum og bókum þá var samt klukkan svo lítið að mig langaði ekki að fara strax heim og "sóa" kvöldinu mínu.. svo að ég fór í Mál og Menningu og á Súfistann og las nokkur Interior Design blöð :) Ég er sko að hanna raðhúsið mitt í huganum. Ég var svo afslöppuð að það var ekki fyrr en ég kom heim að ég sá að ég hafði borgað tæpan 700 kall fyrir tebolla og mozartkúlu. Er það ekki svolítið mikið???? S.s. lítið að frétta hjá mér - en ég skrifa samt :)

2004-12-07T18:53:00.000Z

Nú eru hin árlegu jólapróf skollin á með tilheyrandi inniveru og sóðaskap. Ég var að glugga í ljóðin mín og fann þá þetta kvæði sem ég orti í vorprófunum þegar mér var farið að blöskra lifnaðurinn á mér!!

Feldur á fótum
í fötunum ljótum
sorugir sokkar
og sóðaleg kinn
lyktandi lokkar
og lifnaðurinn
vonandi festir vit rótum!

2004-12-06T09:12:00.000Z

Það er minnst að gera hjá mér svo að ég má skrifa oft í röð....
Ég fékk tilboð í prentun á blaðinu mínu á föstudaginn. Ekki NEMA 1,4 millur í prentun og dreifingu :( stundum þegar strandar á einum hlut þá þarf lítið til þess að maður gefist upp, ég ætla bara að halda áfram að brosa og snúa mér eitthvað annað með blaðið. Breyta kannski aðeins hugmyndinni og ath hvort gott fjölskyldufyrirtæki, t.d. í Slóvakíu vill ekki prenta þetta fyrir mig :) Vinkonur mínar Marta og Stebba eru að láta gera viðskiptaáætlun fyrir sig. Komnar með vörumerki í huga og ætla/langar að gerast innflytjendur. Eða nánar tiltekið innkaupastjórar sem sitja 1x í mánuði á úti-kaffihúsi í suður Evrópu, sötra nokkrar rauðvínsflöskur og fara í pásum og versla föt fyrir búðina sína... og þær vilja fá mig með.... ekki leiðinlegt það :)

2004-12-03T09:10:00.000Z

More...
Ég vildi bæta við heimskupistilinn minn hérna nokkrum dögum á undan.
Ég var að lesa Da Vincy Lykilinn og það sem var búið að segja mér um þessa bók var að hún væri illa skrifuð og fyrirsjáanleg... en samt auðvitað spennandi og fín bók (það þarf nú oft að gagnrýna það sem gott er). Ég sá ekki að hún væri illa skrifuð... kannski illa þýdd á sumum stöðum en ég tók nú eiginlega bara eftir því af því að ég var sérstaklega að athuga það..... svo fannst mér hún alls ekki fyrirsjáanleg.... síðustu kaflarnir í bókinni komu mér oft mjög á óvart. Ætli þetta staðfesti ekki bara heimsku mína....................

2004-12-03T08:48:00.000Z

Elsku Magga til hamingju með afmælið!!!!!!!!!!!!!

Ég var að hugsa um það í gær þegar Halli var að fletta handbókinni sinni "The Little Book of Money" sem er þrælvinstrisinnað rit um ógn kapitalisma og gildi andlegra gæða.....(keypt á hápunkti vinstrisinnaða námsins hans í Brightoin :) ), hvað allt í kringum okkur er orðið klikkað. Það snýst allt um peninga og völd (misjafnt um hvern ræðir) og ósjálfrátt dregst maður inn í þetta með öllum. Ég er orðin þreytt á að leigja þennan kjallara sem við búum í og ligg á netinu að ath. hvort ég geti ekki keypt mér raðhús, með garði, 3 svefnherbergjum og helst nýrri eldhúsinnréttingu. Ég kláraði landfræðina í HÍ og Halli sagnfræðina en núna er hann orðinn stjórnmálafræðingur og ég stefni á framhaldsnám í viðskiptafræði! Það gefur mér nefnilega meiri pening, meira atvinnumöguleika og líkurnar á því að ég geti einhverntíman keypt raðhúsið mitt aukast. Allir í kringum mig eru að fjárfesta í húsum og í dag nennir enginn að "hittast" í kjallaranum hennar Ingu því við verðum að hittast allar í nýja húsinu hennar fkjghnesorztuhkjsed. En þó ástandið sé svona þá eigum við (og margir í kringum mig) líka mjög auðvelt með að draga okkur út úr þessu því við allavega gerum okkur grein fyrir ástandinu. Það sem mér finnst sorglegast er þegar ég ræði við kunningjakonur/vinkonur/vini og þeim finnst bara eðilegt að steypa sér í skuldir, kaupa allt nýtt innbú og alls ekki sama hvar, liggja yfir Marie Claire til að sjá í hverju þær eiga að vera í vetur og bæta bara á yfirdráttinn endalaust af því að svona er bara lífið. Lífið er bara ekkert svona! Hvað ætli við höfum oft fengið spurninguna: " ha eigiði ekki bíl og eruð með 2 börn?????????" "eruði eitthvað þroskaheft???" ! Jú við erum örugglega eitthvað þroskaheft : ) en erum búin að vera í námi í 20 ár og eigum bara ekki pening til að kaupa okkur bíl. Það er víst bara engin afsökun lengur.

2004-12-03T07:52:00.000Z

Samkvæmt stjörnuspánni minni fyrir daginn í dag á ég ekki að viðra skoðanir mínar upphátt í dag. Ef ég geri það, mun fólk halda að ég sé ónærgætin og VERULEIKAFYRRT. Ég á að þegja, læðast með veggjum og halda mig heima!!!
Þetta gæti nú átt fyrir alla daga ársins... þarf að læra að hugsa áður en ég tala

2004-12-02T15:25:00.000Z

Ég fór í ofnæmispróf í morgun. Þær hjá Húðlæknastöðinni sögðu að ALLIR ættu að fara í ofnæmispróf því það er svo margt sem fólk getur haft ofnæmi fyrir en veit ekki af. Plús það að svoleiðis próf kostar um 7000 kall og þau myndu græða feitt ef ALLIR færu í svoleiðis (7000x300.000 samasem 2100000000.. ekki slæmt það :)). Allavega þá ætlaði ég að fá staðfestingu á penicilinofnæminu sem ég hef haft frá því að ég var lítil stelpa og skellti mér því í eitt svona próf. Úr því kom að ég er ekki með ofnæmi fyrir penicilini heldur köttum, barrtrjám og svínakjöti. Reyndar ekkert bráðaofnæmi en daman ráðlagði mér að láta aðra um að skreyta jólatréð og ekki belgja mig út af hamborgarhryggnum um jólin. Hún hefði eins geta sagt mér að hætta að borða og hætta líka að gera mér eitthvað til skemmtunar. Þess vegna ætla ég að láta þessar niðurstöður sem vind um eyru þjóta... nema fínt að hafa ofnæmi fyrir köttum - hálf óhugnaleg dýr finnst mér :S

Helgin framundan. Alltaf jafnskemmtilegt. Kaffiboð á morgun hjá Möggunni, og vonandi sér maður þá líka tvíbbana sem maður sér nú orðið alltof sjaldan. :/

2004-11-30T01:44:00.000Z

Jæja... ég er að hugsa um að byrja að spila manager og hef nú þegar valið nokkra menn í liðið.

1. David James
2. Jamie Redknapp
3. Freddy Ljungberg
4. Fabio Cannavaro
5. Michael Owen
6. Raul
7. Alessandro del piero
8. Alessandro Nesta
9. Harry Kewell

Árennilegt byrjunarlið?? F.v. Jamie Redknapp, Ljungberg og Cannavaro!!

Ég hef ekki ennþá fundið fleiri sem uppfylla kröfurnar sem þarf að uppfylla til þess að komast á listann en ef einhver er með hugmyndir endilega látið mig vita:)

Mig langar að þakka Einari frænda og Braga fyrir góðar ábendingar!!!

2004-11-29T23:53:00.000Z

Átti indæla kvöldstund með Krissu og Þóru. Lét mig hafa það að fá þær í heimsókn, þrátt fyrir miklar annir;) Hef reyndar tekið eftir því að maður er oft ekki lengi að hrista eitt verkefni fram úr erminni ef að maður er kominn í tímaþrot. Ætti kannski að fara að temja mér vinnubrögð þeirra Laugvetninga og byrja aldrei á neinu fyrr en rétt fyrir skil. Það hefur virkað ágætlega í þessi 2 skipti sem ég hef gert það í vetur, en það hlýtur að venjast með tímanum og einkunnir fari þar með hækkandi. Eldaði annars mjög exótískan kjúklingarétt, með kókosmjólk og hnetusósu.. GEÐVEIKT gott. Svo keypti ég tófu til að eiga fyrir Spíjuna ef hún kemur einhverntímann í bandí og þarf að hanga hér á matmálstíma.
Ég var að spá í að ef allir eru í stuði væri jafnvel hægt að skála á föstudagskvöldið og fá sér jafnvel súkkulaðiköku með því... tek mér bara pásu í heimaprófinu... En það verða allir að koma til að ég nenni því... Spíja, Skeinar, Iddibadda, Halli.. og kannski 1-2 í viðbót. Held ég hafi seinast skálað fyrir almælinu mínu þegar ég varð 21 árs og hélt 30 manna partý á Stubaier Gletscher.... Kominn tími til- hélt upp á afmælið í fyrsta skipti sem ég varð tuttuguogeitthvað, og svo næst í seinasta skiptið sem ég er tuttuguogeitthvað. Er þetta ekki geðveikt táknrænt eitthvað?? Tell me hvort þið komist.
Ég kemst svosem any time til Kóngsins, nema fyrstu helgina í des, og ekki seinustu helgi fyrir jól. Annars er ég bara að chilla;)
Iddibadda... ertu búin að versla allt?? En Spíjan?? Hver ætlar þá með mér??

2004-11-29T14:35:00.000Z

17. des komast tvíbbarnir á Laugarvatni... en þú Magga?
Hvenær má svo koma í heimsókn með eina freyðivín og skála fyrir 3. des? Strax að heimaprófi loknu?

2004-11-29T11:28:00.000Z

Fín helgi :D Fullt af gjöfum keyptar og mikið ráp með mömmu. Góður matur og gott vín. Jólahlaðborð á Hereford sem átti að enda með djammi en vegna barna-óþekktar var ég komin heim fyrir kl 10. Halli kom heim kl 5 eftir FRÁBÆRT djamm að hans sögn... nett pirr :)

Við erum boðin til Kóngsins einhverja helgi fyrir jól. Ég á að koma okkur saman um tíma og láta hann vita. Þar sem ég hef alltaf tíma verðið þið að láta mig vita hvenær hentar ykkur. Skiptir engu máli hvað helgi og hvort kvöldið það er.

Leiterspeiter

2004-11-26T11:29:00.000Z

Hlynur er ÆÐI!!!
Á fyrri blók minni gaf ég í skyn að hann elskulegi Hlynur minn út Grafarvoginum væri ekki herramaður og særði hann djúpu sári! Ég tek það allt til baka því á miðvikudaginn á Players bauð hann mér snakk... og lánaði mér vin sinn. Þess fyrir utan er hann "löðrandi í kynþokka" eins og Haffi tók svo vel til orða og með geðveikt flottan rass!! Ekki má gleyma því að hann kýs réttan flokk, borðar ekki dýr og heldur einsamall uppi vörnum hvíta liðsins...

2004-11-25T17:42:00.000Z

Þar sem ég er nú öfgamanneskja dauðans- þá ætla ég bara að skrifa hér í annað skiptið í dag. Eiginlega varð bara að tjá mig um draumfarirnar sem ég átti í morgun. Mig dreymir sjaldnast neitt, og ef það kemur fyrir þá man ég aldrei um hvað draumurinn snerist. Hef samt tekið eftir því að mig dreymir mest á morgnana, þegar ég er ekki lengur í djúpsvefni. Ég get mjög sjaldan leyft mér að liggja svona "laust-sofandi" eitthvað frameftir, því að eins og þeir(fjölmörgu) þekkja sem hafa sofið hjá mér, þá sef ég MJÖG fast. En, semsagt, í morgun, vaknaði ég um 8 leytið og lá svo dormandi fram til kl. 9. Og á þeim tíma átti ég semsagt þennan skelfilega draum! Ég hef ekki geð í mér til að fara út í nein smáatriði, en þetta snerist um flest alla í fjölskyldunni minni, við vorum á balli eða skemmtun, og haldiði að þetta hafi ekki bara snúist upp í allsherjar framhjáhöld og nánast sifjaspell...
Er þetta sönnun þess að ég sé pervert?? Loksins þegar mig dreymir eitthvað sem ég man eftir, þá er það svona?? Vil taka það fram að ég sjálf átti engan þátt í ósiðlegu athæfi, nema náttúrulega að dreyma þennan viðbjóð, en í draumnum var ég alltaf að afhjúpa viðkomandi fólk, fann þau í felum... Ef einhver hefur stúderað Freud í sálfræði (helst lengra kominn en 101) má sá hinn sami hjálpa mér að túlka þetta;)
En, fyrst ég er byrjuð á þessum nótum, þarf ég að halda áfram... finnst ykkur við hæfi að gefa bekkjarsystur minni dildó í þrítugsafmælisgjöf?? Hún hefur ekki verið við karlmann kennd í MARGA mánuði....... Eða er það einum of dónó??

2004-11-25T11:28:00.000Z

Gott að heyra að ekkert kom út úr rannsókninni!
En ég skil þig með athyglisbrestinn.. hjá mér kallast þetta bara leti. Ég var búin að gera plan yfir allt sem ég þyrfti að gera í dag og ég er ekki byrjuð. Fyrsta lagi gat ég ekki vaknað og svo þegar mér tókst að skríða framúr eftir að síminn vakti migkl 9:30.. þá þurfti ég að opna tölvuna til að tékka á einu........ og núna er klukkan 11:39 og hérna er ég enn! Reyndar var þetta skemmtilegt símtal í morgun því mamma var að láta vita að hún er að koma á morgun! Einar... þú ert þar með, með partner á tónleikana annað kvöld. Held að múttu þætti meira en gaman að fara með honum Einsa sínum að tjútta. Sem sagt skemmtileg helgi framundan, væntanlega búðabrjálæði en það er bara stemming.. vona ég. Ég reyni að fara í búðir fyrir hádegi virka daga svo að ég leggist ekki niður í Kringlunni og froðufelli af brjálæði vegna allra sem eru búnir að reka sig utan í mig. Hef enga þolinmæði í troðning. En núna verð ég að fara að gera eithvað - EÐA ég geymi það þangað til á morgun, hef gamla háttinn á og læt mömmu gera þetta fyrir mig. Síjú

2004-11-25T10:23:00.000Z

Er mikið mál að lækna athyglisbrest? Eru ekki til einhverjar töflur bara við honum? Það er fimmtudagsmorgunn og ég er búin að sitja við tölvuna í ca. 2 klst til að klára verkefnin mín svo ég geti nú farið að byrja á prófalestrinum. Á þeim tíma er ég búin að opna skjalið með verkefninu, opna eina internetsíðu þar sem ég get nálgast ferðamálatímarit vegna fræðilegrar umfjöllunar í verkefninu, svo er ég búin að slá upp leitarorðum á google, skoða bæði hotmeil-og HÍ póstinn minn, og þetta er í anað sinn sem ég fer inn á bloggið okkar, ásamt því sem ég er búin að skoða blogg hjá fólki sem ég þekki svo til ekki neitt. Er auk þess búin að vera í tölvupóstssambandi við móður mína 2x í morgun. Það kom ekkert út úr rannsókninni sem hún var í um helgina, sem er GOTT:) Ég reyndar passa mig á að fara ekki inn á msn, því þaðan er ekki aftur snúið;) En ég er ekki búin að skrifa einn staf í verkefnið.... HELP ME PLEASE!!! Ekki bætir það úr skák að leikskólabörnin mín elskulegu eru komin út eldsnemma á morgnana með tilheyrandi látum... og ég ætla ekki að minnast á flugumferðina hér í bæ... hverjum dettur í hug að hafa flugvöllinn "in my back yard"????????????

Var annars boðið í mat í gær til Ernu Kr og Björns, elskhuga hennar, sem by the way er matreiðslumeistari á Perlunni. Hvort haldið þið að hafi eldað?
Geðveikar kalkúnabrignur með sætum kartöflum (sem voru appelsínugular) og jólabjór. Namminamminamm.
En vissuð þið að búrhvalur heitir "sperm whale" á ensku?? Þetta finnst mér nú dónalegt!!

Svo ég víki nú enn einu sinni að þeirri staðreynd að ég er piparmey!!!!!!!! Vitið þið hvað það er oft erfitt? Hún móðir mín, sú bráðmyndarlega og fram úr hófi duglega kona sendi mér nokkrar sultukrukkur (sem hún að sjálfsögðu hafði gert sjálf) og einn morguninn þegar Magga litla var nývöknuð og hugsaði sér gott til glóðarinnar að fá sér sultu og ristað brauð, að þá gat ég ekki með nokkru móti opnað krukkudrusluna. Varð létt pirruð!!

2004-11-24T13:34:00.000Z

Geysilega skemmtileg bíóferð hjá okkur Margréti í gær á Bridget - eitthvað annað en "the Forgotten" sem við eyddum 800 kr hvor í, gosi og poppi. urrrr.

Smá komment á kommentið þitt Magga hér fyrir neðan :) Ég lofa... ekkert barnatal um eyrnarbólgur, svefnleysi, þvott, grát, tanntökur, óeðlilega margar kúkableyjur og magakveisu :) Ég get samt ekki lofað því að nöfn stelpnanna eigi ekki einhversstaðar eftir að koma fyrir ... svona þar sem maður er heimavinnandi 2ja barna móðir með lítið sem ekkert líf utan heimilis :)

2004-11-23T19:02:00.000Z

Komst að því í tíma í dag að ég lifi undir fátækramörkum.
Er orðin stereótýpa við það, einhleyp kona á miðjum aldri í leiguhúsnæði, vinn láglauna hlutastarf við þjónustu... vantar bara tvö til þrjú óskilgetin, föðurlaus börn á bakið, og helst þarf ég að vera örkrumluð líka, þá væri ég skólabókardæmi. Gefið mér tvö til þrjú ár. Þá verð ég búin að redda því, kannski orðin dagdrykkjumanneskja líka:) Verð búin að koma mér á skrá hjá Féló líka í ævilanga áskrift að allskyns ölmusu.
Ef ég næ mér ekki í ríkan kall sem fyrst er ég komin í vítahringinn og dæmi þar með tilvonandi föðurlausu börnin mín til eilífðar fátæktar líka...
Svona er skóladagurinn hjá mér nú uppbyggilegur;)

2004-11-23T16:18:00.000Z

Eftirfarandi STÓRfrétt verður að finna í Morgunblaðinu þann 2 desember:

Á blaðamannafundi sem haldinn var af ÍSÍ í gær var tilkynnt að bjartasta von Íslands, ofurkvendið og framtakskonan Soffía Björg Sveinsdóttir, væri á förum frá landinu á næsta ári þar sem hún hefur hlotið himinháan styrk frá ÍSÍ til að sæka þjálfaranámskeið í bandý í Noregi. Ætla má að við endurkomu hennar muni bandýíþróttin á Íslandi komast á skrið og stefnan verður tekin á HM í Singapore 2005 þar sem hún verður í lykilhlutverki sem þjálfari og í hinni banvænu sókn íslenska liðsins sem einkennist af fimi, lipurð, hraða og boddítékkum!! Henni til aðstoðar verða Friðrik og Oddgeir sem eru kunnir fyrir skipulagshæfileika sína og eljusemi.

2004-11-22T11:06:00.000Z

Eins og það er nú gaman að njóta lífsins með eitt lítið kríli heima, sérstaklega svona fyrir jólin - þá er ekki laust við að maður sakni allra sem núna eru á kafi í próflestri og hafa engan tíma til að skreppa með manni í búðir eða baka piparkökur eða skreppa í gönguferð og skoða jólaljósin. Rakel Birta dóttir mín er reyndar alltaf til í að leika og spjalla en yfirleitt fæ ég ekki að ráða leiknum og spjallið okkar endar oft á einhverjum kúka-nótum. Ég held að við Magga séum farnar að sakna litlu systkyna okkar sem komu í denn og lögðu undir sig íbúðinar okkar um helgar. Einar, þú ert hér með velkominn í sófann og mátt rusla til eins og þú vilt og jafnvel tala svolítið um kúk, Rakel Birta er líka farin að sakna spjallsins... hún nær einhvernvegin betur til þín. En allavega eftir próf þá býð ég ykkur í sterkt jólaglögg og kannski einhverjar girnilegar piparkökur sem Rakel Birta hefur bakað og málað sjálf - með puttunum :) Gangi ykkur vel að læra.

2004-11-20T13:11:00.000Z

Ég er ljóshærð og heimsk með eindæmum.
Ég fékk bréf frá Sólrúnu Karí vinkonu minni og í "from" stóð solrunkari. Ég las þetta að sjálfsögðu sem sol-runkari og opnaði til að sjá hvaða runkari væri að senda mér. Þá var þetta bara Karí ég var lengi að pæla í hvaða húmor þetta væri í henni því pósturinn var ekki á neinum runk-nótum. Seinna þegar ég las póstinn þá small þetta.. solrun-kari. Stupit BLOND! Þegar ég las bloggið frá Fíu þá fattaði ég þetta strax - þ.e.a.s. refill.... T-ið hafði bara dottið af fremst.

Ég verð alltaf svo afbrýðissöm þegar Olla frænka kemur til ykkar í rauðvínsþamb, og búðarráp þannig að ég hringdi í mömmu í gær og bað hana að koma til mín fyrir jólin svo að við gætum rápast pínu og fengið okkur smá í glas og sett upp "svipinn". Mamma er með króníska Reykjavíkur-fóbíu á háu stigi sem kemur alltaf fram þegar hugmynd kemur upp að fara til Reykjavíkur.... Ég ætla að láta þetta takast núna.

Bið að heilsa og skemmtið ykkur vel í Smáralindinni :) Ég kem með næst..

2004-11-19T21:06:00.000Z

Ég afsannaði tvær kenningar í vikunni:
Kenning 1: Allir strákar í Grafarvogi eru herramenn!!! Þá hitti ég Hlyn...
Kenning 2: Ljóskur eru heimskar. Tja... ég var að lita hárið á mér dökkt og hef sjaldan verið jafn heimsk. Hef komið með allavega tvö stórskemmtileg komment í vikunni en ekkert á eftir að slá það út þegar ég eyddi 2 mínútum í það að spá í hvað íslenska orðið "refill" þýddi sem stóð á spjaldi í 10-11. Eftir þessar 2 mínútur las ég allt spjaldið og þar stóð "refill" and telephone cards for sale here!! Hvað er hægt að vera dofinn.

Keppni og bjór í boði fyrir þann sem veit undir hvaða bragarhætti þetta kvæði er ort!! Þetta er nebblega svoldið sniðugt þegar maður fattar það og pælir í því!!!

Jarpur skeiðar fljótur frár
fimur reiða ljónið
snarpur heiðar gjótur gjár
glymur breiða frónið!!!

Jæja rauðvínspartý hjá okkur systrunum og mömmu í kvöld:)